ភ្នំពេញ៖ រថយន្តអគ្គិសនីចំនួន២ ៣២៧គ្រឿង បានចុះបញ្ជីនៅក្រសួងសាធារណការ និងដឹកជញ្ជូន ដោយក្នុងនោះរថយន្តអគ្គិសនីរបស់ក្រុមហ៊ុន BYD ចំនួន៧៩០គ្រឿងឈរលើកំពូលតារាង និងបន្តបន្ទាប់ដោយរថយន្តអគ្គិសនីរបស់ក្រុមហ៊ុន តូយ៉ូតា ចំនួន ៤៤៣គ្រឿង, រថយន្តអគ្គិសនីរបស់ក្រុមហ៊ុន Tesla ចំនួន ២៦៩គ្រឿង និងរថយន្តអគ្គិសនីរបស់ក្រុមហ៊ុនផ្សេងៗទៀត។នេះបើយោងតាមប្រភពក្រសួងសាធារណការនិងដឹកជញ្ជូន។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានប្រាប់បណ្ដាញសារព័ត៌មានថា រយៈពេល៩ខែ ឆ្នាំ២០២៣ មានរថយន្តអគ្គិសនីចុះបញ្ជីចំនួន ២០៣គ្រឿង។ ប៉ុន្តែរយៈពេលដូចគ្នានៅឆ្នាំ២០២៤ មានរថយន្តអគ្គិសនីចុះបញ្ជីចំនួន ១ ៦៤៤គ្រឿង ។បានសេចក្តីថា រថយន្តអគ្គិសនីមានកំណើន ៧១០ភាគរយ ខណៈដែលទោចក្រយានកើនឡើង ៣៦៨ភាគរយ ។រីឯត្រីចក្រយានបែរថយចុះ-១៥%។
រាជរដ្ឋាភិបាលកម្ពុជាបានដាក់ចេញគោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី២០២៤-២០៣០ ដើម្បី ជំរុញការអភិវឌ្ឍវិស័យយានយន្តអគ្គិសនីនៅកម្ពុជា និងការប្រើប្រាស់រថយន្តអគ្គិសនី ព្រមទាំងទាក់ទាញវិនិយោគិនឱ្យមកបណ្តាក់ទុនក្នុងវិស័យនេះ។
សំដៅទៅលើគោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ ដែលជាត្រីវិស័យ និងជាឧបករណ៍គោលនយោបាយរបស់រាជរដ្ឋាភិបាលក្នុងការតម្រង់ទិសនិងជំរុញការអភិវឌ្ឍវិស័យយានយន្តអគ្គិសនីនៅកម្ពុជា ឯកឧត្តម ផន រឹម បានបន្ថែមថា រាជរដ្ឋាភិបាលផ្តល់សេរីភាព និងជម្រើសកាន់តែសំបូរបែបសម្រាប់ការប្រើប្រាស់យានយន្ត ដើម្បីសម្រួលការធ្វើដំណើរ ដឹកជញ្ជូនទំនិញ និងសេវាកម្មផ្សេងៗ។ ជាក់ស្តែង អត្រានៃការប្រើប្រាស់យានយន្តកើនយ៉ាងខ្លាំងជាពិសេសរថយន្តអគ្គិសនី។
ស្របពេលគ្នានេះដែរ ក្រសួងសាធារណការ និងដឹកជញ្ជូនបានជូនដំណឹងអំពីពិព័រណ៍យានយន្តអគ្គិសនី(EV)ឆ្នាំ២០២៤ នឹងចាប់ផ្ដើមក្នុងពេលឆាប់ៗនេះ។ក្រសួងប្រាប់ថា ភ្ញៀវអាចចូលរួមដោយសេរីដើម្បីទទួលបានឱកាសសាកល្បងបើកបរយានយន្ដអគ្គិសនី -ចូលរួមកិច្ចពិភាក្សាជាមួយវាគ្មិនជំនាញ អំពីអនាគតយានយន្តអគ្គិសនីនៅកម្ពុជា -ជួបក្រុមហ៊ុនផ្គត់ផ្គង់យានយន្តអគ្គិសនី និងក្រុមហ៊ុនពាក់ព័ន្ធដោយផ្ទាល់ ដើម្បីសាកសួរព័ត៌មានបន្ថែម តាមកាលបរិច្ឆេទ ថ្ងៃទី២៨ ខែវិច្ឆិកាវេលាម៉ោង ៨:៣០ព្រឹក – ៤:០០រសៀលនៅក្រសួងសាធារណការ និងដឹកជញ្ជូន ។
ជុំវិញយានយន្តអគ្គិសនីនេះដែរកាលពីព្រឹកថ្ងៃពុធទី២៧ ខែវិច្ឆិកា ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានគណៈកម្មាធិការ បានអញ្ជើញដឹកនាំកិច្ចប្រជុំលើកទី៣ របស់គណៈកម្មាធិការបច្ចេកទេសអន្តរក្រសួង ដើម្បីតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្រ្តជាតិសម្រាប់គ្រប់គ្រង និងអភិវឌ្ឍយានយន្តអគ្គិសនី (គ.ល.គ.យ.អ.) កិច្ចប្រជុំនេះធ្វើឡើងក្នុងគោលបំណងដើម្បីពិនិត្យលើបច្ចុប្បន្នភាព និងការវិវដ្តនៃការអនុវត្តគោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី និងលទ្ធផលនៃសិក្ខាសាលាដែលរៀបចំឡើងកាលពីថ្ងៃទី១៨ ខែកញ្ញា ឆ្នាំ២០២៤ ធ្វើបច្ចុប្បន្នភាពលើការអភិវឌ្ឍហេដ្ឋារចនាសម្ព័ន្ធស្ថានីយបញ្ចូលថាមពលយានយន្តអគ្គិសនី ដែលទទួលខុសត្រូវដោយក្រសួងរ៉ែ និងថាមពល និងបង្កើនកិច្ចសហការរវាងក្រសួងសំខាន់ៗ ជាពិសេសក្រសួងសេដ្ឋកិច្ច និងហិរញ្ញវត្ថុ ក្រសួងរ៉ែ និងថាមពល ដែលដើរតួនាទីយ៉ាងសំខាន់ក្នុងការកំណត់គោលនយោបាយលើកទឹកចិត្តសម្រាប់ការវិនិយោគ លើវិស័យយានយន្តអគ្គិសនី និងការអភិវឌ្ឍហេដ្ឋារចនាសម្ព័ន្ធគាំទ្រ។
សូមជម្រាបថា គោលដៅរបស់គោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី គឺចងឱ្យមានរថយន្តអគ្គិសនី ៧៧០ ០០០ គ្រឿង នៅលើផ្លូវនៅឆ្នាំ២០៣០ ស្មើនឹងប្រហែល ១០ ភាគរយនៃចំនួនរថយន្ត ៧,៧៥ លានគ្រឿង ដែលបានចុះបញ្ជីនៅក្នុងប្រទេសកម្ពុជានាពេលបច្ចុប្បន្ន។ចក្ខុវិស័យនៃគោលនយោបាយជាតិ គឺប្រែក្លាយកម្ពុជាទៅជាប្រទេសដែលមានការប្រើប្រាស់យានយន្តអគ្គិសនីក្នុងកម្រិតសុភបរមា (optimal) ដើម្បីគាំទ្រនិងសម្រេចបានការអភិវឌ្ឍប្រកបដោយចីរភាព និងធានានូវសុខុមាលភាពប្រជាជន ។
គួរបញ្ជាក់ថា បច្ចុប្បន្នកម្ពុជាមានស្ថានីយសាកអាគុយរថយន្តអគ្គិសនី មាននៅ១៨ទីតាំងក្នុងប្រទេស៕
