ភ្នំពេញ៖ ការធ្វើតេស PCR គឺការស្វែងរក RNA នៃវីរុសកូវិតផ្ទាល់ ដែលតេស្តនេះមានសុក្រិតភាពខ្ពស់ ប៉ុន្តែចំណាយពេលយូរដើម្បីទទួលបានលទ្ធផលព្រោះម៉ាស៊ីនត្រូវចំណាយពេលរត់។ ការធ្វើតេស្តរហ័ស Covid Rapid Test គឺជាការរកឃើញនូវអង់ទីសែននៃវីរុស ដែលភាពសុក្រិតនៅតិចជាង PCR ប៉ុន្តែអាចទទួលលទ្ធផលលឿនជាងមុន
តើសំណាកគំរូអ្វី ដែលអ្នកត្រូវការ?
»ការយកវត្ថុរាវដែលនៅក្នុងច្រមុះ ឬបំពង់ក
តើអ្នកត្រូវទទួលបានលទ្ធផលក្នុងរយៈពេលប៉ុន្មាន?
»15-20mins អាស្រ័យលើប្រភេទនៃតេស្ត
តើនៅពេលណាគួរធ្វើទើបលទ្ធផលមានភាពសុក្រិតបំផុត?
» ចន្លោះ ថ្ងៃទី ៥ ដល់ ថ្ងៃទី១២ ឬនៅពេលដែលមាន រោគសញ្ញា ដែលគេហៅថាកំឡុងពេលឆ្លង និងពេលចំលង (Infectious Stage) ព្រោះនៅពេលនោះ ជាពេលដែលផ្ទុកវីរុសខ្ពស់បំផុត ហើយសមត្ថភាពនៃការរកឃើញអង់ទីហ្សែន វីរុសក៏ខ្ពស់ដែរ។ ប្រសិនបើអ្នកធ្វើតេស្តរហ័សនៅចន្លោះថ្ងៃទី ១-៥ ឬ បន្ទាប់ពីថ្ងៃទី១២ ឡើងទៅ នោះឱកាសនៃភាពមិនពិតរបស់លទ្ធផលអាច។ ខ្ពស់ដោយសារតែការចុះថយការប្រមូលផ្តុំរបស់វីរុស (False Negative)។ ភាពត្រឹមត្រូវនៃលទ្ធផលត្រូវបានបកស្រាយរួម អមជាមួយប្រវត្តិជំងឺ និងការបង្ហាញរោគសញ្ញារបស់អ្នកជំងឺ ហើយទីតាំងរស់នៅរបស់អ្នកជំងឺ និងទំនាក់ទំនងដែលគាត់បានជួបប្រទះក៏ជាផ្នែកមួយនៃការវាយតម្លៃលើលទ្ធផលតេស្តនេះដែរ។
ការធ្វើតេស្តនេះមិនត្រូវបានគេប្រើប្រាស់ សម្រាប់ការសំរេចចិត្តបញ្ចប់ពេលវេលាចតាឡីស័ក ឬចាប់ផ្តើមការព្យាបាលណាមួយនោះទេ ប៉ុន្តែវាផ្តល់នូវលទ្ធផលរហ័សដែលអាចបន្ថែមបន្ទុកនៃការសង្ស័យកំរិតខ្លាំង និង អាចជួយកំណត់ការសម្រេចចិត្ដ ចតាឡីស័កតំបន់ ឬបុគ្គលណាម្នាក់បានលឿនជាងមុន ដើម្បីគ្រប់គ្រងការរីករាលដាលក្នុងកំឡុងពេលផ្ទុះឡើងនេះ។
ចំពោះបុគ្គលិកសុខាភិបាល នឹងទទួលបានអត្ថប្រយោជន៍យ៉ាងច្រើនពីការធ្វើតេស្តរហ័សនេះដើម្បីកំនត់ចំណាត់ថ្នាក់អ្នកជំងឺ Triage មុនពេលចូលមន្ទីរពេទ្យ ជៀសវាការឆ្លងដោយមិនដឹងខ្លួនទៅបុគ្គលិកសុខាភិបាល ឬអ្នកជំងឺផ្សេងទៀត។
ទោះបីជាការធ្វើតេស្តនេះ លឿនរហ័សនិងងាយស្រួលប្រើក៏ដោយ គុណវិបត្ត ពោលគឺ លទ្ធផលអវិជ្ជមានមិនពិតដែលអាចនាំឱ្យមានការរីករាលដាលនៃវីរុសដោយមិនបានដឹងខ្លួន។ ហេតុនេះហើយទើបបច្ចុប្បន្ន លទ្ធផលនៃការធ្វើតេស្តរហ័ស ត្រូវបានបង្គ្រប់ដោយការធ្វើតេស្ត PCR បន្ថែមម្តងទៀត ជាពិសេស សម្រាប់លទ្ធផលអវិជ្ជមាន ដើម្បីជៀសវាងលទ្ធផលអវិជ្ជមានមិនពិត (False Negative)។
យោងតាមសេចក្ដីជូនដំណឹងរបស់ក្រសួងសុខាភិបាលប្រទេសកម្ពុជានាពេលថ្មីៗនេះ ការធ្វើតេស្តរហ័ស Covid Rapid Test (ការធ្វើតេស្តមេរោគដោយ Antigen វីរុស) ត្រូវបានអនុញ្ញាតិអោយប្រើប្រាស់ក្នុងមន្ទីរពេទ្យឯកជននិងពហុព្យាបាលក្រោមបទបញ្ជានិងគោលការណ៍ណែនាំដែលកំណត់ដោយក្រសួងសុខាភិបាលហើយ៕
ប្រភព៖ វេជ្ជបណ្ឌិត កម្ពុជា
