បរទេស៖ ប្រទេសថៃបានដាក់ចេញនូវគោលដៅដ៏មានមហិច្ឆតាក្នុងការបង្កើតថ្នាក់រៀនឌីជីថលចំនួន១.៥០០ សម្រាប់សាលាគ្រប់ទំហំនៅទូទាំងប្រទេស ដើម្បីបង្កើតបញ្ញាវ័ន្តយ៉ាងហោចណាស់ ១០០.០០០នាក់ក្នុងមួយឆ្នាំ។
ក្រសួងសេដ្ឋកិច្ច និងសង្គមឌីជីថល (DES) បាននិយាយថា ថ្នាក់រៀនទាំងនោះនឹងត្រូវបានបំពាក់ដោយឧបករណ៍សំខាន់ៗ ដូចជាកុំព្យូទ័រ និងកម្មវិធីដែលត្រូវបានរចនាឡើងដើម្បីបង្រៀនជំនាញសរសេរកូដដល់សិស្សានុសិស្ស។
រដ្ឋមន្ត្រីក្រសួង DES លោក ប្រាសឺត ចាន់តារ៉ារឿងតុង បានលើកឡើងអំពីសារៈសំខាន់នៃគម្រោងដែលមានចំណងជើងថា «ការសរសេរកូដសម្រាប់ជីវិតកាន់តែប្រសើរ៖ ការកសាងមូលនិធិសម្រាប់អនាគតរបស់ប្រទេសថៃ»។ លោកបាននិយាយថា តួនាទីរបស់គំនិតផ្តួចផ្តើមក្នុងការបណ្តុះបញ្ញវ័ន្តឌីជីថលរបស់ប្រទេសនេះ នឹងដើរតួជាកត្តាសំខាន់សម្រាប់ការគ្រប់គ្រងរបស់ប្រទេសថៃក្នុងយុគសម័យសេដ្ឋកិច្ចឌីជីថល។
ដោយលើកឡើងអំពីការសិក្សានាពេលថ្មីៗនេះ លោករដ្ឋមន្ត្រីបានកត់សម្គាល់ថា បច្ចុប្បន្ននេះ ប្រទេសថៃទាមទារជាមធ្យមប្រចាំឆ្នាំនូវបញ្ញាវ័ន្តឌីជីថលចំនួន ១០០.០០០នាក់ ខណៈដែលវិស័យអប់រំបង្កើតបុគ្គលបែបនេះបានតែប្រហែល ២៥.០០០នាក់ប៉ុណ្ណោះក្នុងមួយឆ្នាំ។
លោកបាននិយាយថា ផែនការរយៈពេលខ្លីនេះ ពាក់ព័ន្ធនឹងការស្នើសុំការអនុវត្តកម្មវិធី Global Digital Talent Visa និងការណែនាំប្រភេទពិសេសមួយសម្រាប់អ្នករស់នៅរយៈពេលខ្លីជាមួយនឹងសមត្ថភាពឌីជីថលពិសេស។ បច្ចុប្បន្ន គណៈរដ្ឋមន្ត្រីកំពុងពិនិត្យលើសំណើនេះ។
សម្រាប់យុទ្ធសាស្ត្ររយៈពេលវែង ទីភ្នាក់ងារលើកកម្ពស់សេដ្ឋកិច្ចឌីជីថល (Depa) កំពុងជំរុញយ៉ាងសកម្មនូវចំណេះដឹង និងការអភិវឌ្ឍជំនាញឌីជីថលសម្រាប់គ្រប់ផ្នែកនៃប្រជាជនថៃ ដោយថ្នាក់រៀនសរសេរកូដដើរតួនាទីយ៉ាងសំខាន់។
លោក នុតតាផន នីមម៉ាន់ផាតចារីន ប្រធាននាយកប្រតិបត្តិនៃទីភ្នាក់ងារ Depa បាននិយាយថា ក្រោមកម្មវិធី «ការសរសរកូដសម្រាប់ជីវិតកាន់តែប្រសើរ» នេះ វគ្គសិក្សាឯកទេសលើភាសាសរសេរកម្មវិធីនឹងត្រូវបានបង្រៀនដល់សិស្សានុសិស្ស។
ខណៈដែលគ្រោងការណ៍នេះនឹងជួយក្នុងការអភិវឌ្ឍហេដ្ឋារចនាសម្ព័ន្ធសរសេរកូដ និងប្រព័ន្ធអេកូឌីជីថលដែលពាក់ព័ន្ធដើម្បីកែលម្អការត្រៀមខ្លួនក្នុងការសិក្សានោះ លោក នុតតាផន បានកត់សម្គាល់ថា យ៉ាងហោចណាស់គ្រូបង្រៀនចំនួន ៣.០០០នាក់ក៏នឹងត្រូវបានបង្វឹកលើវគ្គបណ្តុះបណ្តាលជំនាញចំនួន២០ ដែលពាក់ព័ន្ធនឹងការអភិវឌ្ឍនៃការសរសេរកូដនៅបីកម្រិត គឺ កម្រិតមូលដ្ឋាន មធ្យម និងកម្រិតខ្ពស់។
សាលារៀនប្រហែល៧០០ បានអនុវត្តរួចហើយនៅក្នុងកម្មវិធីនេះ ដោយទីភ្នាក់ងារ Depa រំពឹងថានឹងសម្រេចបាននូវគោលដៅរបស់ខ្លួន គឺ ១.៥០០សាលានៅក្នុងត្រីមាសទីមួយនៃឆ្នាំក្រោយ៕
ប្រភព៖ AKP
