បរទេស៖ នាយករដ្ឋមន្ត្រីរុស្ស៊ី លោក មីឃែល មីស៊ូស្ទីន បាននិយាយក្នុងអំឡុងពេលនៃកិច្ចពិភាក្សាជាមួយប្រធានាធិបតីចិន លោក ស៊ី ជីនពីង នៅទីក្រុងប៉េកាំងថា ប្រទេសរុស្ស៊ីផ្តល់តម្លៃទៅលើទំនាក់ទំនងដ៏រឹងមាំខាងវប្បធម៌ និងមនុស្សធម៌ជាមួយប្រទេសចិន ហើយការអភិវឌ្ឍទំនាក់ទំនងរវាងប្រជាជន និងប្រជាជនដោយផ្ទាល់ នឹងជួយសម្រួលដល់ការពង្រឹងមិត្តភាពរវាងប្រជាជនរុស្ស៊ី និងប្រជាជនចិន។
លោក មីឃែល បាននិយាយថា «យើងផ្តល់តម្លៃទៅលើទំនាក់ទំនងវប្បធម៌ និងមនុស្សធម៌ដ៏រឹងមាំដែលបង្រួបបង្រួមរុស្ស៊ី និងចិន។ ឆ្នាំនៃ [កិច្ចសហប្រតិបត្តិការរុស្ស៊ី-ចិន] សម្រាប់កាយសម្បទា និងកីឡា បានបញ្ចប់ហើយ ហើយនៅក្នុងឆ្នាំ២០២៤-២០២៥ ទិវាឆ្នាំនៃវប្បធម៌នឹងកើតមានឡើង។ ការប្រាស្រ័យទាក់ទងរវាងប្រជាជន និងប្រជាជន ការស្គាល់ទ្រព្យសម្បត្តិពិសេសនៃប្រវត្តិសាស្ត្រ វប្បធម៌ និងប្រពៃណី [របស់ប្រទេសគ្នាទៅវិញទៅមក] នឹងជួយសម្រួលដល់ការពង្រឹងចំណងមិត្តភាពដែលមានអាយុកាលរាប់សតវត្សរវាងប្រជាជនរុស្ស៊ី និងប្រជាជនចិន»។
លោកក៏បានអបអរសាទរដល់មេដឹកនាំចិនក្នុងខួបលើកទី៤៥ នៃការចាប់ផ្តើមគោលនយោបាយកំណែទម្រង់ និងការបើកចំហ ដែលឥឡូវនេះត្រូវបានប្រារព្ធនៅទូទាំងប្រទេសចិន។ នាយករដ្ឋមន្ត្រីរុស្ស៊ីបាននិយាយបន្ថែមថា «ខ្ញុំសូមអបអរសាទរដោយស្មោះចំពោះអ្នក និងប្រជាជនចិនទាំងអស់ជាមួយនឹងសមិទ្ធិផលដ៏អស្ចារ្យរបស់ប្រទេស [ចិន] ក្នុងការអភិវឌ្ឍសង្គម និងសេដ្ឋកិច្ច ក្នុងការពង្រឹងសិទ្ធិអំណាចរបស់ប្រទេសចិននៅលើឆាកពិភពលោក»៕
ប្រភព៖ AKP
