ប្រុងប្រយ័ត្ន!ល្បិចថ្មី របស់ទំព័រហ្វេសបុក ក្លែងក្លាយដែលបន្លំលួចលេខ សម្ងាត់គណនី ហ្វេសបុករបស់អ្នក

ភ្នំពេញ៖ ក្រុមការងារបច្ចេកទេស នៃនាយកដ្ឋានព័ត៌មានវិទ្យា ទើបបានទទួលសេចក្តីរាយការណ៍ ជាច្រេីនករណី ស្តីពីសារជូនដំណឹង ពីទំព័រហ្វេសប៊ុក ក្លែងក្លាយ ឈ្មោះថា “Faoebook PageVerified Faoebook Corporation Network និង Faoebook Social Media” ដែលបន្លំលួចព័ត៌មាន គណនីហ្វេសប៊ុក (អ៊ីម៉ែល លេខទូរស័ព្ទ និងលេខសម្ងាត់) របស់អ្នកគ្រប់គ្រងទំព័រហ្វេសបុក ដោយប្រេីប្រាស់វិធីសាស្ត្រមួយចំនួន។

យោងតាមនាយកដ្ឋានព័ត៌មានវិទ្យានៃក្រសួងមហាផ្ទៃបានឲ្យដឹងថា វិធីសាស្រ្តដែលបន្លំលួចនោះរួមមានដូចខាងក្រោម ៖
– ទំព័រហ្វេសប៊ុកក្លែងក្លាយ “Faoebook PageVerified Faoebook Corporation Network និង Faoebook Social Media” បានបន្លំខ្លួនមកបានសរសេរថា “ទំព័ររបស់អ្នកត្រូវបានរាយការណ៍ដោយអ្នកផ្សេងអំពីការភូតកុហកឬការបន្លំដើម្បីការពារបញ្ហានេះយើងចាំបាច់ត្រូវផ្ទៀងផ្ទាត់គណនីរបស់អ្នក” រួច Mention ឈ្មោះទំព័រហ្វេសបុកជនរងគ្រោះ ដេីម្បីទាក់ទាញ អ្នកគ្រប់គ្រងផេកចុចចូលមេីលការណែនាំ
– ក្នុងខ្លឹមសារឆបោក បានដាក់តំណរភ្ជាប់ (bit.do/recovery-page-verification) ទៅកាន់គេហទំព័រក្លែងក្លាយបន្លំលួចព័ត៌មាន និងលេខសម្ងាត់ទំព័រហ្វេសបុករបស់ជនរងគ្រោះ
– បន្ទាប់ពីបន្លំលួចយកលេខសម្ងាត់គណនីហ្វេសបុករបស់ជនរងគ្រោះ ពួកគេនឹង Login ចូលគណនីនោះ និងប្រព្រឹត្តិអំពេីល្មេីសច្បាប់ផ្សេងៗ តួរយ៉ាង លួចកាន់កាប់គណនី ឬទំព័រហ្វេសបុកជនរងគ្រោះ (Facebook Account or Page Hijacking) ជាដេីម។

ក្រុមការងានាយកដ្ឋានព័ត៌មានវិទ្យា សូមក្រើនរំលឹកកុំធ្វើ តាមតាមការណែនាំអោយសោះ រួចនាំគ្នាជួយធ្វើការ Report ទំព័រហ្វេសប៊ុកនោះជាការស្រេច។ ចំពោះបងប្អូន ម្ចាស់ទំព័រហ្វេសប៊ុក ដែលបានចាញ់ការឆបោក បានផ្តល់ព័ត៌មានលេខសម្ងាត់ និងកំពុងបាត់បង់គណនី ឬទំព័រហ្វេសបុក សូមធ្វេីការសហការផ្តល់ព័ត៌មាន និងដាក់ពាក្យបណ្តឹងមកកាន់នាយកដ្ឋានព័ត៌មានវិទ្យា ៕