កណ្ដាល៖ ក្រោយពីមានការបាញ់បោះជាច្រើនគ្រាប់ នៅហាងខារ៉ាអូខេប៊ីហ្គោល នគរបាលក្រុងតាខ្មៅ ដឹកនាំដោយលោក ស កែវពិសិដ្ឋ អធិការនគរបាលក្រុង បានចុះធ្វើការស្រាវជ្រាវ ពិនិត្យកន្លែងកើតហេតុ និងដកហូតបានស្រោមកាំភ្លើងខ្លីចំនួនមួយ និងសំបកការទុសមួយចំនួន ខណៈដែលជនដៃដល់ជាខ្មាន់កាំភ្លើងរត់គេចខ្លួនបាត់ ។
យោងតាមអគ្គស្នងការនគរបាលជាតិបានឲ្យដឹងថាករណីនេះ បង្កការភ្ញាក់ផ្អើលឡើង នៅវេលាម៉ោង១០យប់ ថ្ងៃទី២ ខែមិថុនា ឆ្នាំ២០១៩ ត្រង់ចំណុចហាងខារ៉ាអូខេ យីហោ (ប៊ីហ្គោល) ស្ថិតតាមបណ្ដោយផ្លូវលេខ១១៥ ក្នុងសង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
មន្រ្ដីនគរបាលក្រុងតាខ្មៅ បានឲ្យដឹងថា ជនដៃដល់ជាខ្មាន់កាំភ្លើងបើកការបាញ់ប្រហារឈ្មោះ សាន សុច ជាមន្រ្ដីយោធា តែពុំដឹងបម្រើការនៅអង្គភាពណានោះទេ ។
ប្រភពដដែលបន្ដថា នៅមុនពេលកើតហេតុ ជនដៃដល់ជាខ្មាន់កាំភ្លើង និងបក្ខពួក៤ទៅ៥នាក់ បាននាំគ្នាចូលទៅច្រៀងលេងកំសាន្ដ នៅក្នុងហាងខារ៉ាអូខេ យីហោ ប៊ីហ្គោល ។ បន្ទាប់ពីផឹកស្រាស្រវឹងជោគជាំ មិនដឹងថា ជនដៃដល់ជាខ្មាន់កាំភ្លើងខាងលើនេះ ខឹងសម្បារទៅនឹងរឿងអ្វីនោះទេ ក៏បានទាត់ធាក់ធុងទឹកកកបែកអស់មួយ ក្រោយមកក៏គិតលុយបម្រុងចេញមកផ្ទះ ខណៈមើលបុងគិតលុយ ស្រាប់តែឃើញគិតថ្លៃធុងទឹកកកដែលខូចខាត ភ្លាមនោះ ជនដៃដល់ក៏ផ្ទុះក្ដីខឹងសម្បារជាថ្មីម្ដងទៀត រួចរត់ចេញមកក្រៅ សំដៅមករកម៉ូតូរបស់ខ្លួន ហើយដកកាំភ្លើងពីក្នុងកែបម៉ូតូ បាញ់ប្រហារឡើងលើចំនួន៤គ្រាប់ បន្ទាប់មក អូសម៉ូតូចេញមកផ្លូវ មិនអស់ចិត្ដ ក៏បាញ់បន្ថែមមួយគ្រាប់ទៀត បណ្ដាលឲ្យត្រូវរថយន្ដរបស់ពលរដ្ឋដឹកទំនិញកំពុងធ្វើចរាចរណ៍ ទើបជនដៃដល់រូបនេះ បិតសាប៊ូកែងរត់គេចខ្លួនបាត់ តែពុំបណ្ដាលឲ្យនរណាម្នាក់ ត្រូវរបួសនោះទេ ។
តាមការបញ្ជាក់ពីសមត្ថកិច្ចបានឲ្យដឹងថា សមត្ថកិច្ចបានស្គាល់អត្ដសញ្ញាណជនដៃដល់ហើយ តែសុំមិនបញ្ចេញទេ ព្រោះទុកស្រាវជ្រាវ ដើម្បីចាប់ខ្លួនជននេះ យកមកផ្ដន្ទាទោសតាមច្បាប់ ៕
