អតីតកីឡាករតោខៀវ Frank Lampard បានធ្វើការជំរុញឲ្យលោក Maurizio Sarri ត្រូវទុកចិត្តលើកីឡាករវ័យក្មេងរបស់ក្លិប ដោយអាចបំពពេញចន្លោះប្រហោងក្រោយការចាកចេញរបស់កីឡាករ Eden Hazard ។
របាយការណ៍នៅក្នុងប្រទេសបារាំងបានលើកឡើងថា កីឡាករអាយុ ២៨ឆ្នាំ នឹងក្លាយជាកីឡាករដំបូង ក្នុងរដូវកាលទីផ្សារបស់អធិរាជស បន្ទាប់ពីក្លិបយក្សអេស្ប៉ាញនេះ បានត្រៀមកញ្ចប់ប្រាក់១០០លានអឺរ៉ូ ដែលស្មើ ៨៦លានផោន ដើម្បីធ្វើកិច្ចព្រមព្រៀងជាមួយតោខៀវ ។
ជាមួយគ្នានេះដែរ Real Madrid កំពុងត្រៀមធ្វើសេចក្តីប្រកាសជាផ្លូវការ ក្រោយការប្រកួតពាន Europa League ដែលបញ្ចប់ក្នុងខែនេះ ។
ជាមួយការចាកចេញនេះដែរ គ្រូបង្វឹកក្លិប Derby Country ដែលអតីតកាល ជាកីឡាករតោខៀវ បានលើកឡើងថា ទោះការចាកចេញរបស់កីឡាករបែលហ្សិកប៉ះពាល់ដល់ក្លិបក៏ដោយ ក៏គាត់មានទំនុកចិត្ត ទៅលើ Sarri ថាមានកីឡាករវ័យក្មេងដើម្បីទប់ទល់ នឹងការបាត់បង់កីឡាករឆ្នើមនេះ ។
ក្នុងនោះដែរ លោក Lampard ក៏បានជំរុញឲ្យតោខៀវ កុំខ្វល់នឹងការផ្ទេរ ឬផ្លាស់ប្តូរកីឡាករធ្វើអ្វី ត្រូវយកចិត្តទុកដាក់ក្នុងការប្រកួតពាន Europa League វគ្គផ្តាច់ព្រ័ត្រជាមួយ កាំភ្លើងធំ Arsenal ៕
