អ្នកចាត់ការទូទៅក្លិបហង្សក្រហម លោក Jurgen Klopp បានបង្ហាញអារម្មណ៍រំភើប នៅពេលដែលបានប៉ះក្លិបធំ ការប្រកួតធំ ជាមួយក្លិប PSG ដែលជាការប្រកួតមួយក្នុងគ្រុបC នៃក្របខណ្ឌ Champions League ។
រដូវកាលមុនហង្សក្រហម Liverpool ធ្វើបានយ៉ាងល្អ តែរដូវកាលនេះ ត្រូវជួប Napoli, Red Star Belgrade និង ម្ចាស់ពានលីគកំពូលបារាំង ស្ថិតក្នុងគ្រុប C ។
ក្រៅពី PSG ដែលជាជើងខ្លាំង Liverpool ត្រូវប៉ះជាមួយ Napoli ដែលមានគ្រូបង្វឹកល្អធ្លាប់លើកពាន Champions League ៣រដូវកាលគឺលោក Carlo Ancelotti ហើយគ្រូនេះក៏កំពុងកែស្ថានភាពក្លិបផងដែរ ដែលជាហេតុធ្វើឲ្យ Liverpool មានបញ្ហា។
Jurgen Klopp បានប្រាប់គេហទំព័រក្លិបថា យើងបានជួបគ្រុបមួយដែលលំបាក នោះហើយគឺជាការប្រកួត Champions League ។ លោកបានបន្ថែមថា PSG ជាក្លិបមួយដែលចាប់អារម្មណ៍បំផុតលើពិភពលោក ហើយគោលដៅរបស់គេគឺឈ្នះពាន វាគឺជាការប្រកួតមួយដ៏ចាប់អារម្មណ៍។
គ្រូបង្វឹកវ័យ ៥១ ឆ្នាំរូបនេះបានលើកអំពីក្លិប Napoli ថា រដូវកាលមុនយើងបានផ្តួលក្លិបជើងខ្លាំងអ៊ីតាលី ប៉ុន្តែរដូវកាលនេះវាប្រែប្រួលហើយ ខុសគ្នាតែម្តង៕
