អតីត​ប្រធានជាន់ខ្ពស់ FIFA ជាប់គុក ៩ឆ្នាំពីបទពុករលួយ

អតីតប្រធានជាន់ខ្ពស់របស់ FIFA លោក Juan Angel Napout  ត្រូវបានតុលាការអាម៉េរិកកាត់ទោសឲ្យជាប់គុករយៈពេល ៩ឆ្នាំ ពីបទពុករលួយ និងកេងប្រវ័ញ្ច  ដែលធ្លាប់បានប្រព្រឹត្តិក្នុងអំឡុងពេលលោកកាន់កាប់តំណែង​ធំ FIFA ។​

លោក Juan Angel Napout ត្រូវបានតុលាការ​ទីក្រុងញ៉ូវយ៉ក ធ្វើការបើកសវនាការ​កាត់ទោសលោក នៅថ្ងៃពុធ ទី២៩ ខែសីហា ឆ្នាំ២០១៨ ។សេចក្តីថ្លែងការពីការិយាល័យមេធាវីអាម៉េរិក លោក Richard Donoghue  បាននិយាយថា លោក Napout ត្រូវបានកាត់ទោសពីបទបោកប្រាស់  និងលួចបន្លំ សូកប៉ាន់ ជាដើម​ ហើយក៏ត្រូវបង់ប្រាក់ពិន័យ 4.3 លានដុល្លារអាម៉េរិក។

ការកាត់ទោសអតីតប្រធាន់ជាន់ខ្ពស់ខាងលើ ជាការព្រមាន​ដល់មន្ត្រី FIFA ទាំងអស់ ឲ្យប្រុងប្រយ័ត្នខ្ពស់ ចំពោះទង្វើរបស់ខ្លួន ដែលបានធ្វើលើវិស័យ បាល់ទាត់  ហើយក៏ជាការប្រឆាំងអំពើពុករលួយ សូកប៉ាន់ ដែលគ្រប់គ្រងដោយ FIFA ផងដែរ​។

ការកាត់ទោស​លោក Juan Angel Napout  កើតឡើងបន្ទាប់ពីអតីតមេធំសហព័ន្ធបាល់ទាត់ប្រេស៊ីល លោក Jose Maria Marin ត្រូវបានកាត់ទោស ឲ្យជាប់គុករយៈពេល ៤ឆ្នាំ ពីបទរំលោភបំពាន់ និងអំពើពុករលួយ កាលពីដើមខែសីហា ។

លោក Jose Maria Marin អាយុ ៨៦ឆ្នាំ បានទទួល​សំណូក​ លើការផ្លាស់ប្តូរការប្រកួត (លក់គ្រាប់) ក្នុងនោះរួមទាំង  Copa America ផងដែរ​៕