ក្លឹបតោខៀវ គឺជាក្លឹបមួយដែលសកម្មជាងគេនៅក្នុងទីផ្សាដោះដូរនារដូវក្តៅនេះ ដោយបានចុះហត្ថលេខាយកកីឡាករមួយចំនួនរួចហើយ។ ពួកគេបានបរាជ័យក្នុងការផ្ទេរកីឡាករ Omorodion ពីក្លឹប Atletico Madrid ប៉ុន្តែពួកគេក៏យកបានខ្សែបម្រើស្លាប Neto របស់ក្លឹប Wolves ហើយឥលូវនេះពួកគេសង្ឃឹមថានឹងអាចយកបានកីឡាករ Victor Osimhen ពីក្លឹប Napoli ផងដែរ។ ខ្សែប្រយុទ្ធនីហ្សេរីយ៉ា បានប្រាប់ក្លឹបនៅអ៊ីតាលីថាគាត់ចង់ចាកចេញនៅរដូវក្តៅនេះ។
ទោះជាយ៉ាងណាក៏ដោយ បើយោងតាមការចេញផ្សារបស់សារព័ត៌មាន Daily Mail បានអោយដឹងថាក្លឹបតោខៀវ នៅតែសម្លឹងរកមើលខ្សែប្រយុទ្ធម្នាក់ទៀតក្នុងជម្រើសដើម្បីពង្រឹងតំបន់ប្រយុទ្ធរបស់ខ្លួន បើទោះបីជាពួកគេបានចំណាយប្រាក់យ៉ាងច្រើនរួចមកហើយ។ នៅពេលនេះក្រុមនៅភាគខាងលិចទីក្រុងឡុងដ៏ មានកីឡាករសរុបចំនួន ៤៤នាក់ ហើយពួកគេសម្លឹងរកមើលការលក់កីឡាករចេញខ្លះមុនទីផ្សារដោះដូរបិទ។
ក្នុងចំណោមឈ្មោះកីឡាករដែលអាចនឹងចាកចេញរួមមានកីឡាករ Raheem Sterling ត្រូវបានផ្សារភ្ជាប់ជាមួយនឹងក្លឹប Juventus ខណៈក្លឹបនៅអ៊ីតាលីចង់ចុះហត្ថលេខាលើខ្សែបម្រើស្លាបអង់គ្លេសដែលមានបទពិសោធន៍រូបនេះ។
ក្រុមរបស់លោក Enzo Maresca នឹងប្រកួតជាមួយនឹងក្រុម Manchester City នៅថ្ងៃទី១៨ ខែសីហា សម្រាប់ក្របខណ្ឌ Premier League៕
