បរទេស៖ កីឡាករសញ្ជាតិបែលហ្សិកនៅសល់កុងត្រាមួយឆ្នាំទៀតជាមួយ Man City ខណៈខាងក្លឹបនៅ Saudi Pro League បង្ហាញចំណាប់អារម្មណ៍ក្នុងការចុះហត្ថលេខាយកគាត់។ កាលពីខែមុន កីឡាករ De Bruyne បានទទួលស្គាល់ថាខាងក្លឹបនៅអារ៉ាប៊ីសាអូឌីតបានប្រើប្រាស់នៅទឹកប្រាក់យ៉ាងច្រើនដើម្បីបញ្ចុះបញ្ចូលគាត់។ ទោះបីជាបែបនេះក្តី លោក Guardiola នៅតែមិនមានការភ្ញាក់ផ្អើលឡើយ ហើយមានការតាំងចិត្តក្នុងការជឿជាក់ថាកីឡាករ De Bruyne នឹងនៅតែបន្តស្នាក់នៅជាមួយ Man City។
មុនការប្រកួត Pre-Season រវាងក្លឹប Man City និងក្លឹប Celtic នឹងធ្វើឡើងនៅ Chapel Hill រដ្ឋ North Carolina លោក Guardiola បានធានាទៅកាន់អ្នកគាំទ្រថាកីឡាករ De Bruyne នឹងមិនចាកចេញពី Etihad ឡើយ។
លោក Guardiola បានប្រកាសប្រាប់សារព័ត៌មានថា៖ “Kevin មិនចាកចេញទេ។ ប្រសិនបើនរណាម្នាក់ចាកចេញ យើងនឹងនិយាយអំពីរឿងនោះ ហើយពិតណាស់ រហូតដល់ថ្ងៃចុងក្រោយ [នៃទីផ្សារដោះដូរកីឡាករ] យើងមានឱកាស។ ខ្ញុំមិនច្រានចោលនៅការស្វែងរកជម្រើសកីឡាករថ្មីនោះទេ ប៉ុន្តែខ្ញុំគិតថាយើងមានឪកាស ៨០, ៩០, ៩៥% ដែលយើងនឹងនៅធ្វើការជាមួយគ្នា”។
កាលពីរដូវកាលមុន De Bruyne បានដើរតួយ៉ាងសំខាន់ក្នុងយុទ្ធនាការឈ្នះពាន Premier League របស់ក្លឹប Man City ដោយបានជួយក្រុមទទួលបានពានរង្វាន់ជាលើកទីបួនជាប់ៗគ្នា និងជាលើកទីប្រាំមួយរបស់គាត់ជាមួយក្លឹប។ ទន្ទឹមនឹងនេះ អ្នកចាំទីជម្រើសដំបូង Ederson ក៏ត្រូវបានផ្សារភ្ជាប់ជាមួយនឹងការផ្ទេរទៅកាន់មជ្ឈិមបូព៌ាផងដែរ។ ទោះបីជាលោក Guardiola មិនបាននិយាយដោយផ្ទាល់នូវពាក្យចចាមអារ៉ាមនេះក៏ដោយ ប៉ុន្តែការកត់សម្គាល់របស់គាត់បង្ហាញថាក្រុមនៅ Premier League នឹងប្រើប្រាស់នៅអ្វីគ្រប់យ៉ាង ដើម្បីកុំអោយកីឡាករសញ្ជាតិប្រេស៊ីសចាកចេញ។
ការការពារតំណែងជើងឯក Premier League របស់ក្លឹប Man City នឹងចាប់ផ្តើមជាមួយនឹងការប្រកួតដ៏លំបាកជាមួយក្លឹប Chelsea នៅថ្ងៃទី១៨ ខែសីហា។ ទោះជាយ៉ាងណាក៏ដោយ មុននោះ ពួកគេនឹងត្រូវប្រកួតជាមួយគូប្រជែង Manchester United នៅថ្ងៃទី១០ ខែសីហា នៅ Wembley ក្នុងការប្រកួតបើករដូវកាលបាល់ទាត់អង់គ្លេស ហៅថា Community Shield៕
