យោងតាមការចេញផ្សាយរបស UOL បានអោយដឹងកីឡាករ Balotelli កំពុងពិភាក្សាជាមួយក្លឹប Corinthians ជុំវិញការផ្ទេរទៅកាន់ប្រទេសប្រេស៊ីលពីក្រុមទួរគី Adana Demirspor ។ ខ្សែប្រយុទ្ធរូបនេះបច្ចុប្បន្នមានអាយុ ៣៣ ឆ្នាំ ហើយគាត់បានទាមទារប្រាក់ឈ្នួលចំនួន ៤លានផោនក្នុងមួយរដូវកាល ដែលប្រមាណ ៧៥,០០០ផោនក្នុងមួយសប្តាហ៍។
កីឡាករ Balotelli កំពុងស្នាក់នៅជាមួយក្រុម Adana ដោយពួកគេមានជម្រើសក្នុងការពន្យាកុងត្រានៅរដូវកាលបន្ទាប់ទៀតសម្រាប់កីឡាកររូបនេះ។ ប៉ុន្តែក្លឹបនៅមិនទាន់ប្រើប្រាស់ជម្រើសបន្តកុងត្រានេះទេ បើទោះបីជាកីឡាករ Balotelli បានស៊ុតបញ្ចូលទី ៧គ្រាប់ក្នុងការបង្ហាញខ្លួន ១៦ដងកាលពីរដូវកាលមុន។
ក្លឹប Corinthians បាននាំយកលោក Ramon Diaz មកធ្វើជាអ្នកចាត់ការថ្មី ហើយពួកគេកំពុងរង់ចាំអ្នកចាត់ការរូបនេះធ្វើការលើកិច្ចព្រមព្រៀងផ្ទេរកីឡាករ Balotelli។ អ្នកតំណាងរបស់ខ្សែប្រយុទ្ធបានធ្វើការពិភាក្សាជាមួយនឹងក្លឹបនៅប្រេស៊ីលអស់រយៈពេលជាច្រើនសប្តាហ៍កន្លងមកហើយ។
កីឡាករ Balotelli មានអាជីពដ៏អស្ចារ្យមួយនៅអ៊ីតាលីដោយឈ្នះពាន Serie A បីដងជាមួយ Inter ក៏ដូចជា Coppa Italia និង Champions League ។ ហើយកាលនៅក្លឹប Manchester City គាត់បានឈ្នះពាន Premier League និង FA Cup ផងដែរ៕
