អ្នកចាត់ការក្រុមជម្រើសជាតិអង់គ្លេសបានអះអាងថា បញ្ហារបស់ Walker អាចជាការព្រួយបារម្ភមួយរបស់ក្រុមជម្រើសអង់គ្លេស។ លោកបានអះអាងបន្ថែមថា ក្រុមគ្រូពេទ្យនឹងតាមដានស្ថានភាពរបស់កីឡាករមុននឹងផ្តល់ការវាយតម្លៃលើរូបគេ។
កាលពីថ្ងៃសៅរ៍ តារាឆ្នើមរបស់ក្លឹប Manchester City ត្រូវបានគេប្តូចេញក្រោយចូលលេងបានត្រឹមតែ២០នាទីប៉ុណ្ណោះក្នុងការប្រកួតមិត្តភាពជាមួយប្រទេសប្រេស៊ីល ដោយសារតែមានបញ្ហាររបួសសរសៃពួរ។
គ្រូបង្វឹកក្រុមជម្រើសជាតិអង់គ្លេសបាននិយាយប្រាប់ Channel 4 ក្រោយចប់ការប្រកួតថា៖ «យើងមិនទាន់ដឹងនៅឡើយទេ។ គាត់មានអារម្មណ៍អ្វីមួយ ប៉ុន្តែគាត់មិនមែនជាកីឡាករដែលជួបបញ្ហារបួសញឹកញាប់នោះទេ ដូច្នេះគាត់មិនច្បាស់ថាវាជាអ្វីនោះទេ។ យើងត្រូវធ្វើការតាមដាន និងធ្វើការវាយតម្លៃនៅថ្ងៃខាងមុខទៀត»។
ក្លឹប Man City ក៏បានធ្វើការតាមដានទៅលើស្ថានភាពរបួសរបស់ខ្សែការពាររូបនេះ ខណៈពួកគេនឹងត្រូវជួបប្រកួតជាមួយក្រុមកំពូលតារាង Premier League គឺក្លឹប Arsenal នៅសប្តាហ៍បន្ទាប់។ វត្តមានរបស់កីឡាករ Walker នៅក្នុងតំបន់ការពាររបស់ពួកគេគឺមានសារៈសំខាន់ក្នុងជំនួបមួយនេះ ខណៈក្រុមរបស់លោក Pep Guardiola កំពុងតាមពីក្រោយក្រុមកាំភ្លើងធំចំនួន ១ពិន្ទុ។
កីឡាករវ័យ ៣៣ឆ្នាំរូបនេះ ទំនងជាមិនអាចចូលលេងឲ្យក្រុមជម្រើសជាតិបានទេ ខណៈដែលពួកគេនឹងប៉ះបែលហ្សិកក្នុងការប្រកួតមិត្តភាពបន្ទាប់ទៀតរបស់ពួកគេនៅថ្ងៃអង្គារខាងមុខ។ ប្រសិនជាអវត្តមានមែន គាត់នឹងត្រូវស្ថិតនៅក្នុងបញ្ចីរបួសជាមួយកីឡាករ Harry Kane ដែលត្រូវបានលោក Southgate បញ្ជាក់អំពីការដកខ្លួនរបស់ Harry Kane ក្នុងការប្រកួតកាលពីថ្ងៃសៅរ៍៕
