Barcelona បញ្ជាក់ថាមិនមានគោលដៅចូលក្នុងទីផ្សារដោះដូរកីឡាករនាខែមករា សម្រាប់ស្វែងរកអ្នកចាំទីថ្មីឡើយ បន្ទាប់ពី Marc-Andre ter Stegen ទទួលការវះកាត់ខ្នង។ ក្រោយពីការវះកាត់ របាយការណ៍បានបង្ហាញថា គាត់នឹងអវត្តមានប្រហែលពីរខែ។
Xavi មិនមានតម្រូវការក្នុងការដោះដូរកីឡាករក្នុងទីផ្សារផ្ទេរនាពេលខាងមុខ ដើម្បីដោះស្រាយបញ្ហារយៈពេលខ្លីនោះទេ។ គ្រូបង្វឹករូបនេះបានពន្យល់មុនពេលការប្រកួត La Liga ទល់នឹង Girona ថា៖ «វាមិនមែនជាជម្រើសក្នុងការចុះហត្ថលេខាលើអ្នកចាំទីទេ។ យើងជឿជាក់លើអ្វីដែលយើងមាន។ យើងជឿជាក់ថា Marc នឹងជាសះស្បើយឆាប់ៗ»។
ក្នុងការអវត្តមានរបស់ Ter Stegen ត្រូវបានជំនួសដោយអតីតអ្នកចាំទី Barca B កីឡាករ Inaki Pena ។ កីឡាករវ័យ 24 ឆ្នាំរូបនេះត្រូវបានឡើងមកកាន់ក្រុមដំបូងកាលពីរដូវកាលមុន ហើយនេះគឺជាឱកាសដំបូងរបស់គាត់ ក្នុងការទទួលបានការប្រកួតជាបន្តបន្ទាប់។ គាត់បានរក្សា Clean Sheet ទល់នឹង Atletico Madrid៕
