ខ្សែប្រយុទ្ធ Gabriel Jesus របស់ Arsenal បាននិយាយថា ការរកគ្រាប់បាល់មិនមែនបញ្ជាក់ពីភាពខ្លាំងរបស់គាត់ទេ បន្ទាប់ពីខកខានមិនបានស៊ុតបញ្ចូលទីក្នុងអំឡុងពេលបំពេញកាតព្វកិច្ចអន្តរជាតិជាមួយប្រេស៊ីល។
Jesus មិនអាចរកគ្រាប់បាល់បានទេក្នុងការប្រកួតរវាងអាហ្សង់ទីន ទល់នឹងប្រេស៊ីលកាលពីល្ងាចថ្ងៃអង្គារ ដែលពង្រីកកំណត់ត្រារបស់គាត់ដល់ទៅ 9 ប្រកួតដោយគ្មានគ្រាប់បាល់សម្រាប់ក្រុមជម្រើសជាតិ។
កីឡាករវ័យ 26 ឆ្នាំរូបនេះ មានភាពល្អប្រសើរក្នុងកម្រិតក្លឹប ដោយស៊ុតបញ្ចូលទីបាន 11 គ្រាប់ក្នុងការបង្ហាញខ្លួន 26 ប្រកួតនៅ Premier League សម្រាប់ Arsenal កាលពីរដូវកាលមុន ក្រោយផ្ទេរចេញពី Manchester City ក្នុងតម្លៃ 45 លានផោន។
ប៉ុន្តែទោះបីជាកំណត់ត្រាមិនល្អរបស់គាត់សម្រាប់ប្រេស៊ីល Jesus បានប្រាប់អ្នកយកព័ត៌មានក្នុងប្រទេសប្រេស៊ីលថា៖ «មានរឿងដែលរំខានខ្ញុំច្រើនក្រោយ World Cup 2018។ ពេលនោះខ្ញុំនៅក្មេង ខ្ញុំមានចិត្តគំនិតខុសពីគេ។ ប៉ុន្តែថ្ងៃនេះខ្ញុំជាបុរសដែលមានភាពចាស់ទុំ។ ខ្ញុំយល់ថាបាល់ទាត់គឺជាអាទិភាពសម្រាប់ខ្ញុំ ហើយខ្ញុំដឹងថាខ្ញុំត្រូវតែធ្វើឲ្យអស់ពីសមត្ថភាព ជាពិសេសសម្រាប់ប្រេស៊ីល។ ខ្ញុំខំប្រឹងហ្វឹកហាត់ ខ្ញុំព្យាយាម ដើម្បីខ្ញុំជួយក្រុម។ គ្រាប់បាល់មិនមែនបញ្ជាក់ពីភាពខ្លាំងរបស់ខ្ញុំទេ ប៉ុន្តែខ្ញុំនឹងស៊ុតបញ្ចូលទី ខ្ញុំនៅទីនោះដើម្បីរកគ្រាប់បាល់។ ខ្ញុំនឹងធ្វើអោយបានច្រើនក្នុងក្រុមជម្រើសជាតិ»។
«ខ្ញុំជឿថាខ្ញុំអាចស៊ុតបញ្ចូលទីម្តងទៀត វានឹងកើតឡើង។ ខ្ញុំធ្វើការដោយស្ងាត់ស្ងៀម ខ្ញុំមិនមែនជាអ្នកឆ្លើយតបនឹងការរិះគន់ទេ ខ្ញុំមិនមែនជាកីឡាករសប្បាយចិត្តនឹងការសរសើរទេ។ ខ្ញុំ គឺខ្ញុំ»៕
