លោក Erik ten Hag គិតថាការវិលត្រឡប់របស់ Antony អាចនឹងបន្ធូរបន្ថយពីការចោទប្រកាន់ដែលបានធ្វើឡើងប្រឆាំងនឹងខ្សែបម្រើស្លាបរបស់ Manchester United ដូច្នេះវាអាចបញ្ជាក់អោយដឹងថា Antony ពិតជាមិនបានធ្វើរឿងនេះពិតមែន គ្រូបង្វឹកសញ្ជាតិហូឡង់សង្ឃឹមថាកីឡាកវ័យ ២៣ ឆ្នាំអាចនឹងចូលលេងក្នុងការប្រកួត Champions League ។
Ten Hag បានបញ្ជាក់ថា Antony កំពុងស្ថិតក្នុងការពិចារណាសម្រាប់ការប្រកួត Champions League ជាមួយ Galatasaray នៅ Old Trafford ជាងនេះទៅទៀតអ្នកចាត់ការរបស់ Man Utd ក៏បានចេញមុខមកការពារកីឡាករប្រេស៊ីលជុំវិញការចោទប្រកាន់នេះដែរ។
គ្រូបង្វឹកក្រុមបិសាចក្រហម ត្រូវបានគេសួរសំណួរនេះម្តងទៀត ទាក់ទងនឹងការចោទប្រកាន់ Antony ហើយគាត់បានផ្តល់ចម្លើយដ៏ស្រពិចស្រពិល ដោយសំដៅទៅលើការពិតដែលលើកឡើងថា ការចោទប្រកាន់នេះមិនពិតនោះទេ។
Ten Hag បានឆ្លើយតបថា៖ «គាត់បានសហការយ៉ាងល្អជាមួយប៉ូលីស ឥឡូវគាត់ត្រូវបានអនុញ្ញាត្តអោយមកហ្វឹកហាត់វិញ ដូច្នេះការចោទប្រកាន់នេះ ជារឿងប្រឌិត វាមិនមែនជាការពិតនោះទេ»។
គួរបញ្ជាក់ Antony បានចូលខ្លួនសារភាពជាមួយប៉ូលីសនៅទីក្រុង Sao Paulo និងនៅទីក្រុង Manchester នៅថ្ងៃព្រហស្បតិ៍ក្រោយពីការវិលត្រឡប់របស់គាត់មកកាន់ចក្រភពអង់គ្លេសវិញ បន្ទាប់ពីអវត្តមានបីសប្តាហ៍។
ចំណែកខាងក្លឹប Man United បានប្រកាសថាគាត់នឹងបន្តភារកិច្ច ដាក់បញ្ចូលឈ្មោះគាត់ទៅក្នុងក្រុមដំបូងឡើងវិញ បន្ទាប់គាត់ត្រូវបានសម្រាកមួយខែ។
ឥឡូវនេះ Ten Hag ត្រូវតែសម្រេចចិត្តថា តើកីឡាករវ័យ 23 ឆ្នាំរូបនេះអាចស្ថិតក្នុងទម្រង់ក្នុងការលេងពានរង្វាន់អឺរ៉ុបឬយ៉ាងណា ដោយសន្មតថាអ្នកចោទប្រកាន់របស់ Antony ដែលជាអតីតមិត្តស្រីនាង Gabriela Cavallin នឹងត្រូវសម្ភាសន៍ដោយប៉ូលីស Greater Manchester ហើយវាមិនមានផលប៉ះពាល់ក្រុម។
Ten Hag បានបន្ថែមថា៖ «ថ្ងៃអាទិត្យគឺជាថ្ងៃដំបូងរបស់គាត់ក្នុងការហ្វឹកហាត់ជាក្រុម ការហ្វឹកហាត់ចុងក្រោយ ហើយបន្ទាប់មកយើងធ្វើការសម្រេចចិត្ត។ ដូច្នេះ គាត់កំពុងស្ថិតក្រោមការពិចារណា។ Man United កំពុងតែត្រូវការយ៉ាងខ្លាំងសម្រាប់ខ្សែបម្រើស្លាប»។
សូមបញ្ជាក់ផងដែរក្រុម Galatasaray ដែលមិនស្គាល់ចាញ់សោះក្នុង ៧ ប្រកួតនៅរដូវកាលនេះ ដោយឈ្នះ ៦ ស្មើ ១។ ជាមួយគ្នានេះ កាលពីថ្ងៃច័ន្ទម្ចាស់ជើងឯក Champions League បួនសម័យកាល Raphael Varane បានបន្ទរការអះអាងរបស់អ្នកចាត់ការរបស់គាត់ថា Man United ត្រូវតែសាហាជាងមុនក្នុងការវាយប្រហារ។
Varane បាននិយាយថា៖ «ខ្ញុំគិតថាអ្វីដែលយើងអាចកែលម្អបាន គឺធ្វើឱ្យកាន់តែមានប្រសិទ្ធភាពនៅតំបន់រកគ្រាប់បាល់។ យើងត្រូវតែបង្កើតឱកាសឱ្យបានច្រើន ដើម្បីរកគ្រាប់បាល់ ដូច្នេះនោះជាការពិតនៃកម្រិតកំពូលសម្រាប់ក្រុម ដែលអាចឈ្នះពានរង្វាន់ធំៗ។
វាមិនមែនជាការចាប់ផ្តើមនៃរដូវកាលដូចដែលយើងរំពឹងទុកនោះទេ ប៉ុន្តែខ្ញុំនៅតែជឿជាក់ថា យើងមានគុណភាពគ្រប់គ្រាន់ ដើម្បីប្រកួតប្រជែងជាមួយនឹងក្រុមល្អបំផុតនៅក្នុងពិភពលោក»៕
