ម្ចាស់ក្លឹប Liverpool បានយល់ព្រមលក់ភាគហ៊ុនភាគតិចរបស់ Fenway Sports Group ដែលមានតម្លៃចន្លោះពី 82 លានផោនទៅ 164 លានផោនទៅឱ្យក្រុមហ៊ុនវិនិយោគកីឡាពិភពលោក Dynasty Equity។ ការវិនិយោគថ្មីនេះនឹងត្រូវប្រើប្រាស់ជាចម្បង ដើម្បីសងបំណុលធនាគាររបស់ក្លឹប។
ប្រធាន FSG លោក Mike Gordon បាននិយាយថា៖ «ការវិនិយោគរយៈពេលវែងរបស់យើងចំពោះ Liverpool នៅតែរឹងមាំដូចពីមុន។ យើងតែងតែនិយាយថា ប្រសិនបើមានដៃគូវិនិយោគដែលត្រឹមត្រូវសម្រាប់ Liverpool នោះយើងនឹងស្វែងរកឱកាស ដើម្បីជួយធានាឱ្យមានភាពធន់នឹងហិរញ្ញវត្ថុរយៈពេលវែងរបស់ក្លឹប និងការរីកចម្រើននាពេលអនាគត»។
Liverpool បានបាត់បង់ប្រាក់ចំណូល 100 លានផោនក្នុងអំឡុងពេលជំងឺរាតត្បាត Covid-19 ហើយក៏បានចំណាយប្រហែល 50 លានផោនលើកន្លែងហ្វឹកហាត់ថ្មីនៅទីក្រុង Kirkby ដែលបានបើកនៅឆ្នាំ 2020 ក៏ដូចជា 12 លានផោនដើម្បីទិញមូលដ្ឋានហ្វឹកហាត់ Melwood សម្រាប់ក្រុមនារីប្រើប្រាស់។
ការអភិវឌ្ឍន៍ដែលកំពុងបន្តនៃ Anfield Road Stand នឹងត្រូវចំណាយប្រាក់ប្រហែល 80 លានផោន ហើយបន្ទាប់ពីការបញ្ចប់នៃ Main Stand ថ្មីតម្លៃ 114 លានផោនដែលបានបើកនៅឆ្នាំ 2016 ។
ហង្សក្រហមក៏បានចំណាយប្រហែល 145 លានផោនលើការផ្ទេរកីឡាករនៅរដូវក្តៅ ដោយនាំយកខ្សែបម្រើ Dominik Szoboszlai, Alexis Mac Allister, Wataru Endo និង Ryan Gravenberch ។
FSG ត្រូវបានគេយល់ថាចង់កាត់បន្ថយបំណុលធនាគារ ដែលក្លឹបទទួលបានតាមរយៈការផ្តល់ហិរញ្ញប្បទាន នៃគម្រោងហេដ្ឋារចនាសម្ព័ន្ធថ្មីៗទាំងនោះ ហើយកាលក់ភាគហ៊ុនមួយផ្នែកតិចនេះ នឹងជួយដោះស្រាយការចំណាយទាំងនោះ ជាជាងយកលុយដែលបានពីការផ្ទេរកីឡាករមកប្រើប្រាស់។
លោក Gordon បន្ថែមថា៖ «យើងទន្ទឹងរង់ចាំក្នុងការកសាងទំនាក់ទំនងដ៏យូរអង្វែងជាមួយ Dynasty ដើម្បីពង្រឹងបន្ថែមទៀតសម្រាប់ហិរញ្ញវត្ថុរបស់ក្លឹប និងទ្រទ្រង់នូវមហិច្ឆតារបស់យើងសម្រាប់ការបន្តភាពជោគជ័យទាំងនៅលើ និងក្រៅទីលាន»។
FSG ដែលបានទិញ Liverpool ក្នុងកិច្ចព្រមព្រៀង 300 លានផោនក្នុងឆ្នាំ 2010 បាននិយាយនៅក្នុងខែវិច្ឆិកា ឆ្នាំ 2022 ថាពួកគេនឹងពិចារណាជាមួយម្ចាស់ភាគហ៊ុនថ្មី ហើយការវិនិយោគថ្មីសម្រាប់ភាគរយតូចមួយនៃក្រុម Anfield ដំណើរការល្អ។
នាយកប្រតិបត្តិរបស់ Dynasty លោក K. Don Cornwell បាននិយាយថា៖ «Liverpool គឺជាក្លឹបបាល់ទាត់ដ៏ល្បីបំផុតមួយនៅក្នុងពិភពលោក ជាមួយនឹងអ្នកគាំទ្រមានទូទាំងពិភពលោក។ Dynasty មានឯកសិទ្ធិក្នុងការគាំទ្រក្លឹប និងធ្វើការជាមួយ FSG ដើម្បីប្រតិបត្តិលើឱកាសរីកចម្រើនដ៏អស្ចារ្យនាពេលខាងមុខ»៕
