ក្លឹប SSC Napoli បានសុំទោសកីឡាករ Victor Osimhen បន្ទាប់ពីបានបង្ហោះវីដេអូក្នុង TikTok ប្រមាថលើខ្សែប្រយុទ្ធរបស់ពួកគេកាលពីដើមសប្តាហ៍នេះ។
កីឡាករ Osimhen បានគំរាមចាត់វិធានការផ្លូវច្បាប់ទៅកាន់ម្ចាស់ជើងឯក Serie A នៅពេលក្លឹបនៅអ៊ីតាលីមួយនេះបានបង្ហោះវីដេអូ TikTok ដ៏គួរឱ្យភ្ញាក់ផ្អើល បន្ទាប់ពី Osimhen ស៊ុតមិនចូលបាល់ប៉េណាល់ទីក្នុងលទ្ធផលស្មើ 0-0 ជាមួយ Bologna កាលពីល្ងាចថ្ងៃអាទិត្យ។ ការបង្ហោះនោះបានធ្វើឲ្យខ្សែប្រយុទ្ធរូបនេះ ខឹងសម្បាជាខ្លាំង ដែលនាំអោយគាត់លុបរាល់រូបភាពដែលទាក់ទងនឹង Napoli នៅលើគណនី Instagram ផ្ទាល់ខ្លួនរបស់គាត់។
គួរំលឹកឡើងវិញ កាលពីថ្ងៃពុធ ភ្នាក់ងាររបស់ Osimhen លោក Roberto Calenda បាននិយាយថា៖ «យើងរក្សាសិទ្ធិដល់កីឡាករ ហើយយើងនឹងចាត់វិធានការតាមផ្លូវច្បាប់ ដើម្បីការពារ Victor។ អ្វីដែលបានកើតឡើងនៅថ្ងៃនេះនៅលើ Tik Tok ផ្លូវការរបស់ Napoli គឺមិនអាចទទួលយកបានទេ»។
«វីដេអូចំអកឱ្យ Victor ត្រូវបានផ្សព្វផ្សាយជាសាធារណៈ ប៉ុន្តែឥឡូវនេះត្រូវបានលុបចេញហើយ។ ទង្វើនេះដែលក្លឹបហាក់ដូចជាបានមើលងាយកីឡាករ ដែលបណ្តាលឱ្យមានការប៉ះពាល់ផ្លូវអារម្មណ៍កីឡាករយ៉ាងខ្លាំង។ យើងរក្សាសិទ្ធិក្នុងការចាត់វិធានការផ្លូវច្បាប់ដើម្បីការពារ Victor»។
ឥឡូវនេះ Napoli បានចេញសេចក្តីថ្លែងការណ៍ផ្លូវការសុំទោសទៅកាន់ Osimhen ហើយបានបញ្ជាក់ថា ពួកគេមិនដែលមានការគិតប្រមាថ ឬមើលងាយគាត់ជាមួយនឹងវីដេអូនោះទេ។ «ក្នុងករណីណាក៏ដោយ ប្រសិនបើ Victor យល់ឃើញថា មានការប្រមាថចំពោះគាត់ ពួកយើងសុំទោសរាល់គ្រប់យ៉ាងដែលបានកើតឡើង»៕
