លោក Pep Guardiola បាននិយាយថាក្រុម Manchester City របស់គាត់មានបញ្ហាបន្ទាប់ពី Bernardo Silva បានស្ថិតក្នុងបញ្ជីកីឡាករដែលរងរបួស។
កីឡាករសញ្ជាតិព័រទុយហ្គាល់រូបនេះ មានបញ្ហានៅមុនពេលពាក់កណ្តាលតង់ក្នុងការប្រកួត ដែលក្រុមរបស់គាត់ឈ្នះ 3-1 លើក្រុម Red Star Belgrade កាលពីយប់ថ្ងៃអង្គារ។
ក្រោយយកឈ្នះលើក្រុមជើងឯកស៊ែប៊ី លោក Guardiola បាននិយាយថា៖ «ជាក់ស្តែងសម្រាប់ការប្រកួតបន្ទាប់ Bernardo នឹងមិនអាចលេងបានទេ។ ក្នុងពេលនេះយើងមានបញ្ហា ហើយយើងត្រូវតែគិតអំពីរឿងនេះ។ យើងមានកីឡាករសំខាន់ៗចំនួនប្រាំនាក់បានរងរបួស វាពិតជានឹងមានការលំបាកសម្រាប់ក្រុម»។
មានតែ De Bruyne ប៉ុណ្ណោះដែលអវត្តមានរយៈពេលវែង ប៉ុន្តែលោក Guardiola ត្រូវបានគេសួរថា តើមានកីឡាករណានឹងត្រលប់មកវិញ សម្រាប់ការប្រកួតនៅថ្ងៃសៅរ៍ជាមួយ Nottingham Forest ។
Pep បានបន្ថែមថា៖ «សម្រាប់ Kevin និង John ត្រូវការពេលវេលាយូរជាងនេះបន្តិច ប៉ុន្តែ Kovacic អាចនឹងត្រលប់មកវិញ។ ចំពោះ Jack ប្រហែលជាមួយសប្តាហ៍ ឬ 10 ថ្ងៃទៀត»៕
