លោក Jurgen Klopp អ្នកចាត់ការទូទៅរបស់ Liverpool បានបង្ហាញនូវចេតនារបស់ក្លឹប ក្នុងការដណ្តើមយកពានរង្វាន់ Europa League នៅរដូវកាលនេះ បន្ទាប់ពីមិនអាចលេងក្នុងវគ្គជម្រុះ Champions League ។
ក្រុមហង្សក្រហមបានបញ្ចប់ក្នុងចំណាត់ថ្នាក់លេខ 5 ក្នុងក្របខ័ណ្ឌ Premier League កាលពីរដូវកាលមុន ដែលជាកម្រិតទាបបំផុតចាប់តាំងពីការចូលដឹកនាំរបស់លោក Klopp ហើយមិនទទួលបានកៅអីនៅក្នុងការប្រកួតប្រជែងពានកំពូលរបស់អឺរ៉ុប សម្រាប់ឆ្នាំ 2023/24 នោះទេ។
នៅពេលដែលគាត់មិនបានបញ្ចប់ចំណាត់ថ្នាក់កំពូលទាំង 4 លោក Klopp បាននិយាយថា Liverpool នឹងយកចិត្តទុកដាក់ធ្វើឱ្យបានល្អសម្រាប់ការប្រជែងដណ្ដើមយកពាន Europa League ។
ឥឡូវនេះ Liverpool ត្រៀមជួបក្រុម LASK របស់អូទ្រីសក្នុងការប្រកួតបើកឆាកពូលរបស់ពួកគេ ។ លោក Klopp បានប្រាប់ TNT Sports ថា៖ «នេះជាប្រកួតដំបូង និងសំខាន់បំផុត ខ្ញុំគិតថាយើងទាំងអស់គ្នាត្រូវតែធ្វើឱ្យបានល្អ យើងទាំងអស់គ្នាអោយតម្លៃនៅរាល់ការប្រកួតប្រជែងពានរង្វាន់។ វានឹងក្លាយជាការប្រកួតដ៏ធំសម្រាប់ក្រុម ហើយយើងបានត្រៀមខ្លួន 100 ភាគរយសម្រាប់ការឈ្នះពាន»។
«យើងចង់ទៅឱ្យឆ្ងាយតាមដែលអាចធ្វើទៅបាន។ ខ្ញុំចង់ទៅវគ្គផ្តាច់ព្រ័ត្រ ច្បាស់ណាស់ ប៉ុន្តែខ្ញុំមិនមានតម្រុយថា តើយើងអាចឈានដល់កម្រិតណានោះទេ ព្រោះនឹងមានក្រុមបាល់ទាត់ដ៏អស្ចារ្យជាច្រើននៅទីនេះ ដូច្នេះហើយ យើងត្រូវតែធ្វើឱ្យបានល្អបំផុត»។
លើកចុងក្រោយដែល Liverpool លេងនៅ Europa League ដែលមានរយៈពេលប៉ុន្មានខែបន្ទាប់ពី Klopp ចូលមកជំនួសលោក Brendan Rodgers ដែលជាអ្នកចាត់ការក្រុមហង្សក្រហម បានឈានដល់វគ្គផ្តាច់ព្រ័ត្រឆ្នាំ 2016 សម្រាប់ពានរង្វាន់មួយនេះ ប៉ុន្តែត្រូវចាញ់ក្រោមថ្វីជើងក្រុម Sevilla ៕
