អ្នកចាត់ការក្រុម Chelsea លោក Mauricio Pochettino បានបញ្ជាក់ថា Romeo Lavia បានរងរបួសកជើងក្នុងការហ្វឹកហាត់កាលពីសប្តាហ៍មុន ដោយក្លឹបកំពុងរង់ចាំលទ្ធផលពីវេជ្ជបណ្ឌិតទាក់ទងនឹងស្ថានភាពនៃបញ្ហានេះ។
បន្ទាប់ពីការចុះហត្ថលេខាលើតម្លៃ 58 លានផោនពី Southampton Lavia មិនទាន់បង្ហាញខ្លួនជាលើកដំបូងសម្រាប់ Chelsea ទេ ហើយគាត់ មិនត្រូវបានអនុញ្ញាតអោយចូលរួមជាមួយក្រុមជម្រើសជាតិបែលហ្ស៊ិក សម្រាប់ការសម្រាកអន្តរជាតិនាពេលថ្មីៗនេះ ដោយ Pochettino ចង់ផ្តល់ពេលវេលាបន្ថែមទៀតដើម្បីហ្វឹកហាត់។
ជាអកុសល Lavia បានសម្រាកពីការហ្វឹកហាត់កាលពីសប្តាហ៍មុន បន្ទាប់ពីបានរងរបួសកជើង ដែលត្រូវបានរាយការណ៍ថាកីឡាករវ័យ 19 ឆ្នាំរូបនេះនឹងនៅក្រៅទីលានរយៈពេល 6 សប្តាហ៍ទៀត។
លោក Pochettino បាននិយាយនៅពេលអ្នកសារព័ត៌មានសួរអំពី Lavia ថា៖ «យើងពិតជាខកចិត្តណាស់ ព្រោះគាត់ហ្វឹកហាត់បានយ៉ាងល្អកាលពីសប្តាហ៍មុន ក្នុងការសម្រាកអន្តរជាតិ។ គាត់បានរមួលកជើង ហើយឥឡូវនេះ យើងកំពុងរង់ចាំលទ្ធផលពីវេជ្ជបណ្ឌិត។ យើងសង្ឃឹមថាវាមិនមែនជាបញ្ហាធំនោះទេ ប៉ុន្តែក្នុងសប្តាហ៍ចុងក្រោយនេះ គាត់មិនបានហ្វឹកហាត់ជាមួយក្រុមទេ»។
«វាជាស្ថានភាពដ៏សោកសៅមួយ ពីព្រោះគាត់ស្ទើរតែបានបង្ហាញខ្លួនជាមួយក្រុមនៅលើទីលានទៅហើយ ។ ឥឡូវនេះយើងត្រូវរង់ចាំ ហើយសង្ឃឹមថា វាមិនមែនជាបញ្ហាធំសម្រាប់គាត់ និងក្រុមនោះទេ»។
ដោយគេបានសួបន្ថែមថា តើការប៉ាន់ប្រមាណរយៈពេលប្រាំមួយសប្តាហ៍ ត្រឹមត្រូវ ឬអត់ លោកបានប្រាប់ថា៖ « យើងមិនដឹងទេ ព្រោះយើងត្រូវការវាយតម្លៃពីវេជ្ជបណ្ឌិត ។ គាត់បត់កជើង ហើយឥឡូវនេះ យើងក៏កំពុងរងចាំការវាយតម្លៃដូចគ្នា»។
Lavia គឺជាកីឡាករម្នាក់ក្នុងចំណោមកីឡាករ Chelsea មួយចំនួន ដែលបច្ចុប្បន្នកំពុងសម្រាកព្យាបាលរបួស ហើយ Pochettino បានផ្តល់ព័ត៌មានថ្មីៗទាក់ទងនឹងកីឡាកររបស់គាត់។
ដោយចាប់ផ្តើមជាមួយ Reece James លោក Pochettino បានពន្យល់ថា៖ «គាត់ជាសះស្បើយឡើងវិញហើយ។ ខ្ញុំមិនដឹងថាគាត់អាចចូលប្រកួតពេលណា ព្រោះយើងវាយតម្លៃគាត់ជារៀងរាល់ថ្ងៃ ប៉ុន្តែគាត់បានចាប់ផ្តើមធ្វើអ្វីៗនៅលើទីលានជាមួយបាល់បាន។ ខ្ញុំសង្ឃឹមថាឆាប់ៗនេះ ដូច្នេះគាត់អាចមានវត្តមាននៅមុនពេលសម្រាកអន្តរជាតិបន្ទាប់»។
ចំពោះខ្សែការពារកណ្តាល Benoit Badiashile បានត្រលប់មកហ្វឹកហាត់វិញហើយ ប៉ុន្តែមិនទាន់ត្រៀមខ្លួនសម្រាប់ការវិលត្រលប់មកចូលរួមជាមួយការប្រកួតវិញទេ ហើយខ្សែប្រយុទ្ធ Armando Broja ក៏ដូចគ្នាដែរ គាត់នឹងត្រលប់មកវិញភ្លាមៗនៅចុងសប្តាហ៍នេះ៕
