លោក Luis Rubiales បានបញ្ជាក់ថា គាត់បានលាលែងពីតំណែងជាប្រធានសហព័ន្ធរបស់អេស្ប៉ាញ បន្ទាប់ពីបានថើបនាង Jenni Hermoso ក្នុងអំឡុងពិធីប្រគល់មេដាយកិត្តិយសក្នុងការប្រកួត World Cup នារីឆ្នាំ 2023។
ចាប់តាំងពីប្រធានសហព័ន្ធបាល់ទាត់អេស្ប៉ាញ (RFEF) បានព្យាយាមរក្សាតំណែងរបស់គាត់ និងបានបដិសេធមិនព្រមលាលែងពីតំណែង បើទោះបីជាមានសម្ពាធយ៉ាងខ្លាំងក៏ដោយ។
កីឡាការិនី Hermoso បានបញ្ជាក់ថា ប្រធានសហព័ន្ធបាល់ទាត់អេស្ប៉ាញ (RFEF) បានស្នើឱ្យនាងធ្វើសេចក្តីថ្លែងការណ៍ជាមួយមិត្តរួមក្រុមរបស់នាង ដើម្បីកាត់បន្ថយសម្ពាធលើលោក ហើយថាសហព័ន្ធបាល់ទាត់អេស្ប៉ាញ បានព្យាយាមបង្ខិតបង្ខំមិត្តភ័ក្តិ និងក្រុមគ្រួសាររបស់នាងឱ្យធ្វើសេចក្តីថ្លែងការណ៍គាំទ្រ Rubiales ។
ម្ចាស់ជើងឯក World Cup បានដាក់ពាក្យបណ្តឹងផ្លូវច្បាប់ប្រឆាំងនឹង Rubiales ហើយថ្មីៗនេះគាត់ក៏ត្រូវបាន FIFA ពិន័យព្យួរការងារ ដោយកីឡាករិនីក្រុមជម្រើសជាតិអេស្ប៉ាញ មិនយល់ស្របចំពោះការថើបមួយនេះ។
ទីបំផុត Rubiales បានបញ្ជាក់ពីការលាលែងរបស់គាត់ពី RFEF ដោយសរសេរក្នុងសេចក្តីថ្លែងការណ៍មួយថា៖ «បន្ទាប់ពីការព្យួរពី FIFA បូករួមទាំងរឿងរាវផ្សេងទៀតដែលបានប្រឆាំងនឹងខ្ញុំ វាជាភស្តុតាងដែលថាខ្ញុំមិនអាចត្រលប់ទៅកាន់តំណែងរបស់ខ្ញុំបានទេ។ ខ្ញុំបានធ្វើការសម្រេចចិត្តយល់ព្រមចាកចេញពីតំណែងមួយនេះ»។
នៅក្នុងបទសម្ភាសន៍ជាមួយ Piers Morgan ដែលបានថតកាលពីល្ងាចថ្ងៃអាទិត្យ Rubiales បានបញ្ជាក់ថាគាត់បានសម្រេចចិត្តលាលែងពីតំណែង បន្ទាប់ពីបាននិយាយជាមួយគ្រួសាររបស់គាត់ដោយបង្ហាញថា៖
«ខ្ញុំបាននិយាយជាមួយឪពុកខ្ញុំ កូនស្រីរបស់ខ្ញុំ ។ ខ្ញុំក៏បាននិយាយជាមួយមិត្តភក្តិមួយចំនួនដែលជិតស្និទ្ធនឹងខ្ញុំផងដែរ។ ពួកគេបាននិយាយថា “Luis អ្នកត្រូវតែផ្តោតលើសេចក្តីថ្លៃថ្នូររបស់អ្នក ដើម្បីបន្តជីវិតរបស់អ្នក ព្រោះបើមិនដូច្នេះទេអ្នកនឹងធ្វើឱ្យប៉ះពាល់ដល់មនុស្សដែលអ្នកស្រលាញ់ កីឡាដែលអ្នកស្រលាញ់ និងការដេញថ្លៃការប្រកួតបាល់ទាត់ពិភពលោកឆ្នាំ 2030 ដែលអ្នកចង់បាន»៕
