កីឡាករ Aymeric Laporte បានចែករំលែកសារលាដ៏កក់ក្តៅមួយទៅកាន់អ្នកគាំទ្រ Manchester City នៅពេលដែលគាត់ជិតដល់ការផ្ទេរទៅ Al-Nassr ។
ខ្សែការពារសញ្ជាតិអេស្បាញបានបង្ហោះសារលាដ៏រំជួលចិត្ត រួមជាមួយនឹងវីដេអូ។ គាត់បានសរសេរថា៖ «ជំរាបសួរ អ្នកគាំទ្រ City ថ្ងៃនេះខ្ញុំចង់ចែករំលែករឿងមួយជាមួយអ្នក។ រយៈពេល 5 ឆ្នាំកន្លះដែលមិនអាចបំភ្លេចបាន ការចងចាំជាច្រើនដែលខ្ញុំនឹងរក្សាជារៀងរហូតនៅក្នុងបេះដូងរបស់ខ្ញុំ។ អ្វីដែលខ្ញុំចងចាំបំផុតគឺការឈ្នះពានរង្វាន់ ការស៊ុតបាល់បញ្ចូលទី និងការប្រកួតប្រជែងនៅក្នុង Premier League ។ ប៉ុន្តែខ្ញុំក៏នឹងចងចាំពីរឿងមិនល្អផងដែរ ការរងរបួស និងការត្រូវបានដកចេញ ការបរាជ័យ និងកំហុសដែលខ្ញុំបានធ្វើ»។
«ខ្ញុំចង់អរគុណអ្នកគ្រប់គ្នា អគុណដល់ Man City ក្រុមប្រឹក្សាភិបាល គ្រូបង្វឹក មិត្តរួមក្រុម និងបុគ្គលិកក្លឹបទាំងមូល។ វាជាកិត្តិយស និងសេចក្តីរីករាយ ហើយខ្ញុំសង្ឃឹមថាអ្នកនឹងចងចាំខ្ញុំអំពីរឿងល្អៗ ។ ខ្ញុំសូមជូនពរឱ្យអ្នកជួបតែសំណាងល្អនាពេលអនាគត ហើយខ្ញុំនឹងតាមដានអ្នកជានិច្ច រហូតដល់យើងជួបគ្នាម្តងទៀត»។
កំឡុងពេលគាត់នៅអង់គ្លេស កីឡាករវ័យ 29 ឆ្នាំរូបនេះបានឈ្នះពានរង្វាន់ចំនួន 15 ជាមួយ Man City ដែលរួមមានពានរង្វាន់ Premier League ចំនួន 5 និងពានរង្វាន់ Champions League ចំនួន 1 UEFA SUPERCUP ចំនួន 1 ENGLISH LEAGUE CUP ចំនួន 4 ENGLISH SUPER CUP ចំនួន 2 និង ENGLISH FA CUP ចំនួន 2 ។
គួរបញ្ជាក់ផងដែរថា Laporte ត្រូវបានគេរាយការណ៍ថាបានបញ្ចប់ការពិនិត្យសុខភាពរបស់គាត់នៅ Al-Nassr ហើយឥឡូវនេះគ្រោងនឹងចុះហត្ថលេខាលើកិច្ចសន្យារយៈពេល 3 ឆ្នាំជាមួយក្រុម Saudi Pro League៕
