លោក Carlo Ancelotti បានសរសើរ Jude Bellingham ហើយបានអះអាងថា ខ្សែបម្រើសញ្ជាតិអង់គ្លេសរូបនេះ ត្រូវបានទទួលភារកិច្ចជំនួសខ្សែប្រយុទ្ធ Karim Benzema ។
កីឡាករសញ្ជាតិអង់គ្លេសរូបនេះបានស៊ុតបញ្ចូលទីបាន 3 គ្រាប់រួចមកហើយក្នុងការបង្ហាញខ្លួនពីរលើកដំបូងសម្រាប់ក្លឹបថ្មីរបស់គាត់។ Real Madrid មិនទាន់បានចុះហត្ថលេខាលើអ្នកជំនួស Karim Benzema ដែលបានចាកចេញទៅចូលរួមជាមួយក្រុម Al-Ittihad ។
អវត្ដមានរបស់ខ្សែប្រយុទ្ធឆ្នើមរូបនេះ បានធ្វើអោយលោក Ancelotti កែប្រែទម្រង់លេងរបស់គាត់ក្នុងរដូវកាលនេះ ខណៈដែលគាត់កំពុងដាក់ Bellingham លេងជាខ្សែបម្រើប្រយុទ្ធ នៅពីក្រោយខ្សែប្រយុទ្ធពីររូប ។
នៅពេលសួរអំពីលទ្ធភាពរបស់ Madrid ក្នុងការចុះហត្ថលេខាលើខ្សែប្រយុទ្ធថ្មីបន្ទាប់ពីការចាកចេញរបស់ Benzema លោក Ancelotti បានប្រាប់សារព័ត៌មាន Serie A ថា «យើងជឿថាការមកដល់របស់ Bellingham អាចបំពេញអវត្តមានរបស់ Karim បាន។ Bellingham គឺជាក្មេងប្រុសដែលមានភាពចាស់ទុំ និងមានសមត្ថភាព។ អ្វីដែលគាត់កំពុងធ្វើ មិនគួរឲ្យភ្ញាក់ផ្អើលសម្រាប់អ្នកដែលស្គាល់គាត់នោះទេ អ្វីដែលគួរឲ្យភ្ញាក់ផ្អើលនោះ គឺគាត់មានអាយុត្រឹមតែ ២០ ឆ្នាំតែប៉ុណ្ណោះ»៕
