ភ្នំពេញ៖ កីឡាករ កីឡាការិនីពិការកម្ពុជាសរុបចំនួន ២៣៦នាក់ បានចុះឈ្មោះរួចរាល់ ដែលទទួលស្គាល់ដោយគណៈកម្មការអន្តរជាតិ សម្រាប់ដាក់ចូលឱ្យប្រកួតក្នុងចំណោមប្រភេទកីឡាចំនួន១៤ បូករួមទាំងកីឡា E-Sport ក្នុងនាមជាម្ចាស់ផ្ទះ កីឡាអាស៊ានប៉ារ៉ាហ្គេម លើកទី១២ ដែលគ្រោងធ្វើឡើងពីថ្ងៃទី០៣-០៩ ខែមិថុនា ឆ្នាំ២០២៣។
ឯកឧត្ដម យី វាសនា អគ្គលេខាធិការគណៈកម្មការជាតិប៉ារ៉ាឡាំពិកកម្ពុជា និងជាអគ្គលេខាធិការរង CAMSOC-CAMAPGOC មានប្រសាសន៍ថា មកដល់ពេលនេះ អត្តពលិកពិការកម្ពុជា មានចំនួន ២៣៦នាក់ ដែលត្រៀមចូលរួមប្រកួតប្រជែងជាមួយអត្តពលិកមកពី១០ប្រទេសផ្សេងទៀត ក្នុងអាស៊ីអាគ្នេយ៍ លើ១៤ប្រភេទកីឡា។ ក្នុងនោះកម្ពុជាមានកីឡាករ ១៦០នាក់ និងកីឡាការិនី ៧៦នាក់ និងមន្ត្រីបច្ចេកទេស ៦៤នាក់។ ឯកឧត្ដមបន្ដថា នេះជាកត្តាមួយដ៏ចាំបាច់ ដែលកម្ពុជាធ្វើជាម្ចាស់ផ្ទះ ហើយកម្ពុជាបាន ត្រៀមខ្លួនឱ្យបានល្អ ខណៈទីលានត្រូវបានរៀបចំរួចរាល់ស្របតាមស្តង់ដារ ដោយចំណាយទឹកប្រាក់សរុបប្រមាណ១លានដុល្លារអាម៉េរិក។
ការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នៅកម្ពុជាមាន១៤ប្រភេទកីឡារួមមាន៖ អត្តពលកម្ម, វាយសី, ប៊ូស្យា, អុក, បាល់ទាត់៥ម្ខាង, បាល់ទាត់៧ម្ខាង, បាល់បោះពិការភ្នែក, យូដូ, លើកទម្ងន់, ហែលទឹក, វាយកូនឃ្លីលើតុ បុរស-នារី, បាល់ទះអង្គុយបុរស-នារី, បាល់បោះជិះរទេះបុរស-នារី, និងកីឡាអេឡិចត្រូនិក (ការប្រកួតសម្តែង)៕
ប្រភព៖ ទីភ្នាក់ងារសារព័ត៌មានកម្ពុជា
