ខ្សែការពារកណ្តាលរបស់ Barcelona កីឡាករ Gerard Pique បានប្រកាសចូលនិវត្តន៍បន្ទាប់ពីការប្រកួតកាលពីចុងសប្តាហ៍មុន។ កីឡាករវ័យ 35ឆ្នាំរូបនេះបានលេងក្នុងការប្រកួតចុងក្រោយរបស់គាត់សម្រាប់ក្លឹបកាលពីថ្ងៃសៅរ៍ទី 5 ខែវិច្ឆិកាជាមួយនឹងក្រុម Almeria ។ គាត់បានរក្សា Clean Sheet ខណៈដែល Barcelona ទទួលបានជ័យជំនះ 2-0 លើក្រុមបាតតារាង។
Pique ដែលជាយុវជនរបស់សាលា La Masia បានចាកចេញទៅ Man United ក្នុងឆ្នាំ 2004 និងត្រូវបានខ្ចីជើងទៅក្លឹប Real Zaragoza ក្នុងរដូវកាល 2006-2007 ហើយបន្ទាប់ពីត្រូវបានខ្ចីជើងមួយរដូវកាល គាត់បានត្រលប់មកចូលរួមជាមួយបិសាចក្រហមរហូតដល់ឆ្នាំ 2008។ បន្ទាប់មកគាត់បានត្រលប់ទៅក្លឹបកុមារភាពរបស់គាត់នៅទឹកដីអេស្ប៉ាញវិញ។
Pique បានបង្ហាញខ្លួនចំនួន 616 ប្រកួតឱ្យក្រុម Catalans ដោយស៊ុតបញ្ចូលទីបាន 53 គ្រាប់ និងបញ្ជូនបាល់ឱ្យមិត្តរួមក្រុមបញ្ចប់ទីបាន 15 ដង។ គាត់បានឈ្នះពានរង្វាន់ជាច្រើនជាមួយនឹងក្រុមនៅ La Liga រួមទាំងពានរង្វាន់ UEFA Champions League ចំនួនបី និងពានរង្វាន់លីកចំនួនប្រាំបី។
គាត់ក៏បានឈ្នះពានរង្វាន់ Champions League និង Premier League មួយជាមួយនឹងក្រុម Man United ទោះបីជាបង្ហាញខ្លួនបានត្រឹមតែ 22 លើកសម្រាប់ពួកគេក៏ដោយ។
ក្នុងអាជីព ១៨ឆ្នាំរបស់គាត់ កីឡាករអេស្ប៉ាញរូបនេះបានលេងក្រោមអ្នកចាត់ការក្លឹបជាច្រើន។ គ្រូបង្វឹកទាំង 5នាក់នេះដែល Pique បានបង្ហាញខ្លួនច្រើននៅលើទីលានក្រោមការគ្រប់គ្រងរបស់ពួកគេដែលមានដូចជា៖ លោក Xavi, លោក Gerardo Martino, លោក Ernesto Valverde, លោក Luis Enrique និងលោក Pep Guardiola៕
