យោងតាមអ្នកកាសែតអ៊ីតាលីលោក Tancredi Palmeri បានអោយដឹងថាក្រុមសេះបង្កង់ Juventus កំពុងពិចារណាបណ្តេញលោក Massimiliano Allegri ហើយបានទាក់ទងអ្នកចាត់ការ Tottenham Hotspur លោក Antonio Conte ។
អ្នកគាំទ្រមានការត្អូញត្អែជុំវិញការដឹកនាំរបស់លោក Allegri ដែលទទួលបន្ទុកក្រុម Juventus ដោយក្រុមសេះបង្កង់បានចាប់ផ្តើមរដូវកាលដ៏ខកចិត្តមួយ ព្រោះថាបច្ចុប្បន្នពួកគេឈរនៅលេខរៀងទី 8 ក្នុងតារាង Serie A ។
ក្រុម Juventus ឈ្នះ 2 ស្មើ 4 និងចាញ់ 1 ដងក្នុងការប្រកួតបើកឆាក 7 លើករបស់ពួកគេ។ លោក Allegri បានអះអាងថាគាត់មិនព្រួយបារម្ភអំពីតួនាទីរបស់គាត់បន្ទាប់ពីការបរាជ័យក្នុងផ្ទះ 2-1 របស់ Juventus ក្រោមថ្វីជើងក្រុម Benfica ក្នុងក្របខ័ណ្ឌ Champions League ដោយនិយាយទៅកាន់ Daily Mail ថា៖
«ខ្ញុំមិនមានអារម្មណ៍ថា ការងាររបស់ខ្ញុំនៅទីនេះមានគ្រោះថ្នាក់ទេ។ វាជារឿងធម្មតាទេដែលមានពេលវេលាមិនល្អនៅក្នុងបាល់ទាត់។ យើងត្រូវប្រឹងប្រែងធ្វើការ និងផ្លាស់ប្តូរស្ថានភាពដ៏អាក្រក់នេះ ហើយយើងមានកីឡាករសំខាន់ៗជាច្រើននាក់ទៀតរងរបួស»។
ទោះបីជាយ៉ាងណាក៏ដោយលោក Palmeri អះអាងថាប្រធានក្លឹប Juventus លោក Andre Agnelli បានដកទំនុកចិត្តពីលោក Allegri ហើយទំនាក់ទំនងដំបូងជាមួយលោក Conte ត្រូវបានធ្វើឡើង។
Conte គឺជាអតីតអ្នកចាត់ការទូទៅរបស់ Juve ដោយបានបង្វឹកក្រុមពីឆ្នាំ 2011 ដល់ 2014 ដោយបានឈ្នះពានរង្វាន់ Serie A ចំនួនបីដងនៅក្នុងពេលនោះ។
គ្រូបង្វឹកជនជាតិអ៊ីតាលីបច្ចុប្បន្នកំពុងធ្វើការនៅក្រុមមាន់ខ្នាយមាស ។ គាត់បានដឹកនាំ Spurs ឡើងដល់ចំណាត់ថ្នាក់លេខ 4 ក្នុងលីគកាលពីរដូវកាលមុន។
អតីតគ្រូបង្វឹក Chelsea និង Inter Milan កំពុងមើលការខុសត្រូវលើការចាប់ផ្តើមដ៏អស្ចារ្យក្នុងយុទ្ធនាការឆ្នាំ 2022-23 សម្រាប់ក្រុមភាគខាងជើងទីក្រុងឡុងដ៍។
Spurs បានចាញ់តែមួយប្រកួតប៉ុណ្ណោះក្នុងរដូវកាលនេះ ហើយនោះគឺជាការចាញ់ 2-0 ក្រោមថ្វីជើងក្រុម Sporting CP ក្នុងការប្រកួត Champions League កាលពីថ្ងៃទី 13 ខែកញ្ញា។
បច្ចុប្បន្នពួកគេឈរនៅលេខរៀងទី 3 ក្នុងតារាង Premier League ដោយបានឈ្នះការប្រកួតចំនួន 5 ក្នុងចំណោមការប្រកួតលីកចំនួន 7 ហើយលោក Conte នៅសល់មួយឆ្នាំទៀតលើកុងត្រាបច្ចុប្បន្នរបស់គាត់ជាមួយ Spurs៕
