កីឡាករជម្រើសជាតិព័រទុយហ្គាល់អាយុក្រោម 21 ឆ្នាំបានចូលរួមជាមួយក្លឹបភាគខាងជើងទីក្រុងឡុងដ៍ពីក្លឹប FC Porto ក្នុងតម្លៃប្រហែល 40 លានអឺរ៉ូ នេះបើយោងតាមការចេញផ្សាយរបស់ The Athletic ។
តារាចំណូលថ្មីរបស់ក្លឹប Arsenal កីឡាករ Fabio Vieira បានប្រៀបធៀបទម្រង់លេងរបស់គាត់ទៅនឹង Lionel Messi ហើយថែមទាំងបានបង្ហើបថា គាត់យកគំរូតាមមិត្តរួមជាតិរបស់គាត់គឺ Cristiano Ronaldo ។
Vieira បាននិយាយថា ទម្រង់លេងរបស់គាត់មានលក្ខណៈស្រដៀងទៅនឹងកំពូលតារាឆ្នើមអាហ្សង់ទីន Lionel Messi ខណៈដែលពួកគេទាំងពីរសុទ្ធតែប្រើជើងឆ្វេងដូចគ្នា។ គាត់បានប្រាប់ The Athletic ថា៖
«ខ្ញុំស្រលាញ់ Ronaldo និង Messi។ ខ្ញុំចូលចិត្ត Messi ដោយសារស្ទីលលេង។ យើងប្រើជើងឆ្វេង ហើយមានគុណភាពដូចគ្នា»។
អតីតខ្សែបម្រើរបស់ក្លឹប FC Porto បានទទូចថាគាត់ទទួលយកការបំផុសគំនិតពី Ronaldo មិនមែនដោយសារតែគាត់ជាជនជាតិព័រទុយហ្គាល់នោះទេ ប៉ុន្តែដោយសារតែចិត្តគំនិត និងសមត្ថភាពស៊ុតបញ្ចូលទីដ៏អស្ចារ្យរបស់គាត់៕
