អ្នកកាសែតដ៏ល្បីល្បាញលោក Dean Jones បានលើកឡើងថា ខ្សែបម្រើស្លាបរបស់ Chelsea កីឡាករ Hakim Ziyech អាចផ្ទេរទៅកាន់ Manchester United ។
Jones បានប្រាប់ Give Me Sport ថា៖ «ការផ្ទេរ Ziyech ទៅ AC Milan មានការរអាក់រអួលបន្តិច ហើយប្រសិនបើស្ថានភាពនោះអូសបន្លាយតទៅទៀត សូមកុំបដិសេធគំនិតដែលថា Ten Hag ចង់យកគាត់ទៅ Man Utd ជំនួសវិញ»។
Erik ten Hag បានស្គាល់ Ziyech យ៉ាងជិតស្និទ្ធតាំងពីពេលគាត់នៅ Ajax ហើយបានគ្រប់គ្រងគាត់អស់រយៈពេលជិត 2 ឆ្នាំកន្លះ មុនពេលដែលខ្សែបម្រើស្លាបរូបនេះបានផ្លាស់ទៅ Chelsea ។
គួររំលឹកឡើងវិញដែរថា កីឡាករវ័យ 29 ឆ្នាំរូបនេះបានបង្ហាញទម្រង់លេងយ៉ាងល្អបំផុតក្នុងជីវិតរបស់គាត់ ក្រោមការដឹកនាំរបស់គ្រូបង្វឹកសញ្ជាតិហូឡង់ ដោយស៊ុតបញ្ចូលទីបាន 35 គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបាន 53 ដងក្នុង 100 ប្រកួត៕
