លោក Jamie Redknapp បានសរសើរតារាឆ្នើមរបស់ Manchester City កីឡាករ Kevin De Bruyne សម្រាប់ការបង្ហាញទម្រង់លេងដ៏អស្ចារ្យរបស់គាត់ ដែលបានជួយក្រុមឲ្យឈ្នះការប្រកួតទល់នឹង Manchester United ។ អតីតតារា Liverpool រូបនេះបានប្រដូចកីឡាករវ័យ ៣០ ឆ្នាំទៅនឹងវីរបុរសបាល់ទាត់ Paul Scholes និង Steven Gerrard ។
Kevin De Bruyne បានបង្ហាញទម្រង់លេងយ៉ាងល្អជាមួយក្រុម Manchester United កាលពីយប់មិញ ដោយស៊ុតបញ្ចូលទីបានពីរគ្រាប់ និងបញ្ជូនបាល់ឱ្យមិត្តរួមក្រុមបានមួយគ្រាប់ ខណៈដែលក្រុម Manchester City ដណ្តើមបានជ័យជម្នះយ៉ាងលើសលប់ក្នុងលទ្ធផល ៤-១ លើគូប្រជែងដ៏សំខាន់របស់ពួកគេក្នុងការប្រកួត Derby ។
ថ្លែងទៅកាន់ Sky Sports លោក Redknapp បាននិយាយថា៖ «គាត់ស្រដៀងនឹង Paul Scholes ក្នុងការទាត់បាល់ ប៉ុន្តែរហ័សដូច Steven Gerrard។ វាជាការរីករាយក្នុងការមើលគាត់។ គាត់ពិតជាអស្ចារ្យណាស់។ គាត់ខុសពីកីឡាករភាគច្រើន»៕
