ខ្សែប្រយុទ្ធ Cristiano Ronaldo របស់ក្រុម Manchester United អាចនឹងដើរតួយ៉ាងសំខាន់ក្នុងការតាមប្រមាញ់ខ្សែបម្រើ Ruben Neves របស់ក្លឹប Wolverhampton Wanderers ។ កីឡាករសញ្ជាតិព័រទុយហ្គាល់រូបនេះ ត្រូវបានផ្សារភ្ជាប់ជាមួយនឹងការផ្លាស់ប្តូរទៅកាន់ក្រុម Manchester United បន្ទាប់ពីជួយក្រុម Wolves ឲ្យឡើងទៅកាន់ក្របខ័ណ្ឌ Premier League នៅក្នុងឆ្នាំ ២០១៨ ។
កាសែត The Sun បានរាយការណ៍ថា បិសាចក្រហមបានល្បួងដើម្បីទាក់ទាញ Neves ឲ្យផ្លាស់មកកាន់ Old Trafford ប៉ុន្តែទោះជាយ៉ាងណាក៏ដោយ ការផ្ទេរនេះមិនបានជោគជ័យក្នុងអំឡុងទីផ្សារដោះដូរកីឡាករខែមករា។
សារព័ត៌មានអ៊ីតាលី Calciomercato រាយការណ៍ថាក្លឹបយក្សអ៊ីតាលី Juventus បានចូលរួមការប្រជែងយកកីឡាករអន្តរជាតិព័រទុយហ្គាល់រូបនេះ ដែលរកបាន ២៣ គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទី ១១ ដងក្នុងការបង្ហាញខ្លួន ២០៣ លើកសម្រាប់ Wolves ។
ទោះជាយ៉ាងណាក៏ដោយ គេជឿជាក់ថា Manchester United គឺជាអ្នកនាំមុខគេក្នុងការចុះហត្ថលេខាលើ Neves ។ នេះគឺដោយសារតែពួកគេមានកីឡាករសញ្ជាតិព័រទុយហ្គាល់ Cristiano Ronaldo និង Bruno Fernandes នៅក្នុងក្រុមរបស់ពួកគេ។
យោងតាម Givemesport បញ្ជាក់ថា៖ «ឱកាសក្នុងការលេងជាមួយ Ronaldo និង Bruno Fernandes ច្បាស់ជាអ្វីដែលនឹងទាក់ទាញ Ruben Neves ឲ្យទៅចូលរួមជាមួយ Manchester United»៕
