គ្រូបង្វឹកក្រុម Manchester United លោក Ralf Rangnick បានរិះគន់ទៅលើទម្រង់លេងក្រុមរបស់គាត់នៅក្នុងតង់ទីមួយនៃការប្រកួតរបស់ពួកគេជាមួយនឹងក្រុម Atletico Madrid កាលពីថ្ងៃពុធ។ បិសាចក្រហមបានត្រឹមស្មើ ១-១ ជាមួយនឹងក្រុមរបស់លោក Diego Simeone ក្នុងជើងទីមួយនៃជុំទី ១៦ ក្នុងក្របខ័ណ្ឌ Champions League ។
លោក Rangnick បាននិយាយនៅក្នុងសន្និសីទសារព័ត៌មានក្រោយការប្រកួតថា៖ «យើងមានការភ័យព្រួយជាមួយនឹងបាល់ក្នុងតង់ទីមួយ យើងមិនប្រថុយប្រថានឡើយ នៅពេលដែលយើងគ្រប់គ្រងបាល់ យើងគ្រាន់តែលេងត្រឹមកម្រិតពាក់កណ្តាលរបស់យើង ដោយមិនមានការរត់ចូលជ្រៅពេកឡើយ«។
ទោះជាយ៉ាងណាក៏ដោយលោក Ralf Rangnick ពេញចិត្តនឹងការបង្ហាញទម្រង់លេងនៅតង់ទីពីររបស់ក្រុមគាត់។ អ្នកចាត់ការសញ្ជាតិអាឡឺម៉ង់រូបនេះ បានរីករាយនឹងការប្រយុទ្ធ និងភាពធន់ដែលក្រុមរបស់គាត់បានបង្ហាញទល់នឹង Atletico Madrid ដោយបានលើកឡើងថា៖
«នៅតង់ទី២ យើងកាន់តែល្អ យើងមានការគ្រប់គ្រងបាល់បានច្រើនជាងមុន ហើយយើងមានឱកាសក្នុងការតាមស្មើក្រុមម្ចាស់ផ្ទះ»។
ការសម្រេចចិត្តរបស់លោក Ralf Rangnick ក្នុងការជំនួស Marcus Rashford ជាមួយនឹង Anthony Elanga នៅនាទីទី ៧៥ បានបង្ហាញពីប្រសិទ្ធភាព ខណៈដែលកីឡាករវ័យក្មេងរូបនេះ បានស៊ុតបញ្ចូលទីឱ្យក្រុមបិសាចក្រហមត្រឹមតែ ៥ នាទីបន្ទាប់ពីការប្តូរចូល ហើយ Elanga បានក្លាយជាអ្នកស៊ុតបាល់បញ្ចូលទីដ៏សំខាន់សម្រាប់ Manchester United ក្នុងរដូវកាលនេះ៕
