ខ្សែបម្រើ Jorginho របស់ Chelsea បានសារភាពថាគាត់ “សុបិន” ចង់លេងក្រោមការដឹកនាំរបស់គ្រូបង្វឹក Manchester City លោក Pep Guardiola ។
គួរជម្រាបថា គ្រូបង្វឹកសញ្ជាតិអេស្ប៉ាញរូបនេះ ត្រូវបានគេចាត់ទុកថា ជាគ្រូបង្វឹកដ៏អស្ចារ្យបំផុតមួយក្នុងប្រវត្តិសាស្ត្រនៃការប្រកួត ដោយបានឈ្នះពានរង្វាន់ Premier League ចំនួន ៣ ដង ពានរង្វាន់អឺរ៉ុបចំនួន ២ និងពានរង្វាន់ផ្សេងៗជាច្រើនទៀត។
ទន្ទឹមនឹងនោះដែរ Jorginho ត្រូវបានចាត់ទុកថា ជាកីឡាករមួយដែលទទួលបានភាពជោគជ័យបំផុតក្នុងអាជីពបាល់ទាត់របស់ខ្លួន ដោយបានរួមចំណែកជួយឱ្យ Chelsea ឈ្នះជើងឯក UEFA Champions League, UEFA Super Cup និង FIFA Club World Cup កាលពីថ្មីៗនេះ ក្រោមការដឹកនាំរបស់អ្នកចាត់ការ Thomas Tuchel។
នៅជម្រើសជាតិអ៊ីតាលីឯនោះវិញ ខ្សែបម្រើការពាររូបនេះ ជាផ្នែកមួយដ៏សំខាន់ ក្រោមការដឹកនាំដោយគ្រូបង្គោល Roberto Mancini ក្នុងការគ្រងតំណែងជើងឯកពានរង្វាន់អឺរ៉ុប EURO 2020។
មុនផ្លាស់មកចូលរួមទឹកដី Stamford Bridge កាលពីឆ្នាំ២០១៨ ខ្សែបម្រើអ៊ីតាលី មានដើមកំណើតប្រេស៊ីលរូបនេះ បានទម្លាយឱ្យដឹងថា គេកៀកនៅក្នុងការផ្ទេរទៅចូលរួមក្លិប Manchester City ទៅហើយ ដោយសារគេមានក្ដីស្រមៃចង់លេងក្រោមការដឹកនាំរបស់លោក Pep Guardiola។
Jorginho បាននិយាយថា៖ “ខ្ញុំមិនគ្រោងផ្ទេរទៅ Chelsea ទេ។ ខ្ញុំត្រៀមក្នុងការផ្ទេរទៅក្លិបមួយផ្សេងទៀតនៅអង់គ្លេស។ ហើយបន្ទាប់មកវាបានកើតឡើង ដូចអ្វីដែលបានកើតឡើងអ៊ីចឹង ហើយខ្ញុំបានមកដល់ Chelsea”។
នៅពេលដែលត្រូវបានសួរពាក់ព័ន្ធនឹងក្ដីស្រម៉ៃលេងក្រោមការបង្វឹកដោយលោក Guardiola, Jorginho បានឆ្លើយថា៖ “ខ្ញុំមាន។ ខ្ញុំមិនដឹងថាវានឹងកើតឡើងឬអត់ទេ។ កាលខ្ញុំនៅពីក្មេង ខ្ញុំបានមើលឃើញក្រុម Barcelona របស់គាត់ឈ្នះគ្រប់យ៉ាងជាមួយ Ronaldinho, Xavi និង Iniesta”៕
