កីឡាករ Sergi Roberto លឺថានឹងត្រៀមចែកផ្លូវគ្នាជាមួយក្លិបអ្នកមានបុណ្យ FC Barcelona នៅពេលខាងមុខហើយ ខណៈដែលសុពលភាពកុងត្រាសេសសល់ត្រឹមបញ្ចប់រដូវកាល។
Roberto បានជួបបញ្ហារបួស ហើយមិនទាន់បានបង្ហាញខ្លួនលើទីលាន តាំងពីខែ តុលា ឆ្នាំ ២០២១ មកម្ល៉េះ ដោយថាមិនត្រូវគេអាចនឹងសម្រាកដល់អស់កុងត្រាក៏ថាបាន។
យោងតាមសារព័ត៌មាននៅឯអេស្ប៉ាញបានចុះផ្សាយថា ខ្សែបម្រើវ័យ ៣០ ឆ្នាំរូបនេះ បើទោះបីគេព្រមព្រៀងកាត់បន្ថយថ្លៃពលកម្មឲ្យទាបជាងបច្ចុប្បន្នក៏ដោយ តែក្លឹបហាក់លែងចង់រក្សាវត្តមានគេបន្តទៅទៀតហើយ។ និយាយជារួមទៅ បើចរចាកុងត្រាឲ្យលឿនជាងនេះបន្តិច ប្រហែលជាអាច តែដល់ពេលជិតផុតទើបសម្រេច គឺក្លឹបនឹងមិនយល់ព្រមឡើយ។
គួរបញ្ជាក់ថា Roberto បានចាយពេលសឹងតែមួយអាជីព ជាមួយអ្នកមានបុណ្យ ដោយតាំងពីដើមមក គេបានចូលរួមនៅថ្នាលយុវជន Barca កាលពី ឆ្នាំ ២០០៦ ហើយឡើងមកលេងឲ្យឈុតធំពេញសិទ្ធនៅឆ្នាំ ២០១៣។ សរុបស្ថិតិបង្ហាញខ្លួន ៤២២ ប្រកួតរកបាន ១៩ គ្រាប់ និង Assist ៤០ លើក៕
