អ្នកវិភាគ Sky Sports លោក Paul Merson ជឿជាក់ថា Cristiano Ronaldo ជំពាក់ Anthony Elanga នូវ «ការសុំទោសដ៏ធំមួយ» បន្ទាប់ពីគាត់មានកំហុសអំឡុងពេល Manchester United ឈ្នះ Brentford កាលពីល្ងាចថ្ងៃពុធ។
ជាការពិតណាស់ Elanga បានរកគ្រាប់បាល់បើកឆាក ខណៈដែលក្រុមរបស់លោក Ralf Rangnick បានបន្តដើម្បីទទួលបានជ័យជម្នះ ៣-១ ។
ប៉ុន្តែ Ronaldo បានដណ្តើមយកចំណាប់អារម្មណ៍ បន្ទាប់ពីប្រតិកម្មរបស់គាត់ ចំពោះកាប្តូរចេញនៅក្នុងតង់ទីពីរ។ Ronaldo បានត្រឡប់ពីរបួសត្រគាក សម្រាប់ការប្រកួត ហើយ Rangnick បានពន្យល់ក្រោយការប្រកួតថា គាត់ត្រូវការជើងថ្មីល្បឿនលឿនដើម្បីឱ្យក្រុមទទួលបានជ័យជម្នះ។
យ៉ាងណាមិញលោក Merson មានអារម្មណ៍ថា Ronaldo បានធ្វើឲ្យខូចពេលដ៏សំខាន់របស់ Elanga សម្រាប់ Man United ។ ពោលគឺ ទស្សនិកជនបានមើលរំលង ចំពោះការស៊ុតបញ្ចូលទីរបស់ Elanga បែរជាទៅចាប់អារម្មណ៍កាយវិការខឹងសម្បារបស់ CR7 ទៅវិញ។
Merson បានសរសេរនៅលើកាសែត Daily Star ថា «Cristiano Ronaldo ជំពាក់ Anthony Elanga នូវការសុំទោសដ៏ធំមួយ» ។ «ក្មេងប្រុសដ៏កំសត់រូបនេះ បានចាប់ផ្តើមការប្រកួត Premier League លើកដំបូងរបស់ខ្លួន ក្នុងរដូវកាលនេះ ដោយស៊ុតបញ្ចូលទីឱ្យ Manchester United ។ ហើយបន្ទាប់មក Ronaldo ត្រូវបានប្តូរចេញ និងមានកាយវិការមិនស័ក្តិសម។ ពេលដែលវាបានកើតឡើង ដូចដែលខ្ញុំបាននិយាយទៅកាន់មិត្តរួមការងាររបស់ខ្ញុំថា៖ «អ្នកមើល អ្នកនឹងមិនដឹងថាក្មេងប្រុសដ៏ល្អនេះបានស៊ុតបាល់បញ្ចូលទីនោះទេ»៕
