ក្លិប Barcelona បានបើកផ្លូវឱ្យ Ousmane Dembele ចាកចេញនៅក្នុងទីផ្សារដោះដូរខែមករានេះ បើយោងតាមការលើកឡើងរបស់នាយកបច្ចេកទេសរបស់ក្លិបលោក Mateu Alemany បន្ទាប់ពីធ្លាក់ចេញពី Copa de Rey។
យោងតាមប្រភពពីសារព័ត៌មានអេស្ប៉ាញ Mundo Deportivo បានរាយការណ៍ថា ក្លិបបីគឺក្លិបអង់គ្លេស Chelsea, Manchester United និងក្លិបអ៊ីតាលី Juventus អាចជាគោលដៅសម្រាប់ Dembele ប្រសិនបើខ្សែប្រយុទ្ធបារាំងរូបនេះ ចាកចេញពី Camp Nou។
ប្រភពខាងលើបានបញ្ជាក់ថា ក្លិបដែលមានក្ដីរំពឹងខ្ពស់ថាអាចនាំយក Dembele មកចូលក្រុមគឺក្លិបពីរនៅអង់គ្លេស។ អ្នកសារព័ត៌មាន Pedro Almeida កាលពីថ្មីៗនេះ បានទម្លាយថាក្លិបតោខៀវ បានដាក់សំណើតម្លៃ ១៥លានអឺរ៉ូក្នុងការចរចាផ្ទេរ Dembele។
ប៉ុន្ដែប្រសិនបើអតីតសមាជិករបស់ Borussia Dortmund មិនចង់លេងនៅអង់គ្លេសទេនោះ គេនៅមានជម្រើសក្នុងការទៅចូលរួមក្លិបសេះបង្កង់ Juventus ដែលកំពុងត្រូវការកីឡាករបន្ថែម ដើម្បីជួយបំពេញតំបន់ប្រយុទ្ធ៕
