ខ្សែប្រយុទ្ធបារាំង Karim Benzema ត្រូវបានគេរាយការណ៍ថា អាចនឹងចាកចេញពី Real Madrid ប្រសិនបើកីឡាករគោលដៅរបស់ក្លិបយក្សអេស្ប៉ាញមួយនេះ យល់ព្រមផ្ទេរមកនោះ។
ជាការពិតណាស់ Benzema បានក្លាយជាផ្នែកដ៏សំខាន់មិនអាចខ្វះបានរបស់ក្រុម ដោយបានរកគ្រាប់បាល់បញ្ចូលទី ១៧ គ្រាប់ និងបញ្ជូនបាល់ឱ្យមិត្តរួមក្រុមស៊ុតបាន ៧ លើករួចមកហើយ ពីការបង្ហាញខ្លួន ២០ លើកសម្រាប់ក្របខ័ណ្ឌ La Liga ក្នុងរដូវកាលនេ។
ទោះជាយ៉ាងណា បើយោងតាមសារព័ត៌មាន El Nacional បានអះអាថា កីឡាករវ័យ ៣៤ ឆ្នាំរូបនេះ កំពុងតែពិចារណាចាកចេញពីរដ្ឋធានីអេស្ប៉ាញ បន្ទាប់ពីចាយពេលអស់ ១៣ ឆ្នាំនៅក្លឹប ក្រោយបញ្ចប់ការផ្ទេរមកពីក្រុម Lyon នៅក្នុងឆ្នាំ ២០០៩ ។
ប្រភពដដែលនេះ បានបង្ហាញទៀតថា Benzema ហាក់មិនសប្បាយចិត្តជាមួយនឹងការព្យាយាមរបស់ក្លិប Madrid ក្នុងការតាមចុះហត្ថលេខាលើខ្សែប្រយុទ្ធ Kylian Mbappe និង Haaland នោះទេ ដោយសារតែវានឹងធ្វើឲ្យប្រជាប្រិយភាពរបស់ខ្សែប្រយុទ្ធសញ្ជាតិបារាំងធ្លាក់ចុះ នៅទឹកដី Bernabeu ។
ជាមួយគ្នានោះ កិច្ចសន្យារបស់ Benzema ដែលនឹងត្រូវផុតកំណត់នៅរដូវក្តៅឆ្នាំ ២០២៣ ប្រធានក្លឹប Real Madrid លោក Florentino Perez នៅតែចង់ផ្តល់កុងត្រាបន្ថែមទៀតសម្រាប់រូបគេ ប៉ុន្តែផ្ទុយទៅវិញ កីឡាកររូបនេះ ហាក់មិនព្រមទទួលយកនោះទេ ។
ប្រភពខាងលើ បានបន្តទៀតថា ជាមួយនឹងការចាប់អារម្មណ៍របស់ក្លិប Paris Saint-Germain អាចនឹងធ្វើឲ្យ Benzema ចាប់អារម្មណ៍ ជាពិសេសប្រសិនបើលោក Zinedine Zidane ត្រូវចូលកាន់តំណែងនៅក្លិប ក្នុងរដ្ឋធានីប្រទេសបារាំង៕
