វីរបុរសបាល់ទាត់ស្កុតលែនលោក Steve Nicol បានចេញមុខរិះគន់អ្នកចាត់ការទូទៅក្រុម Manchester United លោក Ralf Rangnick ថាមិនចេះប្រើប្រាស់ ខ្សែប្រយុទ្ធ Mason Greenwood ឲ្យត្រូវក្បួន។
ជាការពិតណាស់ បន្ទាប់ពីក្រុមបិសាចក្រហម ត្រូវបានទទួលរងបរាជ័យនៅក្នុងកីឡដ្ឋានរបស់ខ្លួន Old Trafford ទល់នឹងក្រុមចចក Wolverhampton យើងឃើញថាលោក Rangnick បានទទួលរងការរិះគន់ជាច្រើនពីសំណាក់អ្នកគាំទ្រ អំពីការរៀបចំទម្រង់លេងរបស់លោក។
លោក Steve បាននិយាយថា៖ «ខ្ញុំគិតថា ក្នុងនាមជាគ្រូបង្វឹក អ្វីដែលអាក្រក់មើលបំផុតនោះគឺ ពេលដាក់កូនក្រុមខ្លួនឲ្យចូលទីលាន ហើយតែមិនដឹងត្រូវប្រើប្រាស់គេដោយរបៀបម៉េច។ មួយវិញទៀត បើថាមិនចេះប្រើប្រាស់ទេ សុំត្រឹមពេលឃើញខុស លើកដៃចង្អុលហើយកែតម្រូវទៅបានហើយ ប៉ុណ្ណឹងគឺអាចដោះស្រាយបានហើយ។ លើសពីនេះទៅទៀត ខ្ញុំមិនយល់ថា លោក Rangnick ដាក់ឲ្យ Greenwood លេងនៅតំបន់ណាឲ្យប្រាកដទេ ព្រោះខ្ញុំងាកមកម្តងឃើញនៅស្លាបស្តាំ ងាកម្តងទៀតឃើញនៅឆ្វេង ហើយពេលងាកម្តងទៀតឃើញនៅកណ្តាលម្តង ខ្ញុំមិនដឹងថា ហេតុអ្វីបានជាលោក Rangnick ដាក់ឲ្យគេរត់ពាសពេញទីលាន ចឹងទេ»៕
