ក្លិបតោខៀវ Chelsea ត្រូវបានរាយការណ៍ថា កំពុងចង់បានខ្សែបម្រើការពារ Declan Rice របស់ក្លិប West Ham United ហើយអាចនឹងប្រជែងជាមួយ Manchester United ក្នុងការចុះហត្ថលេខាផ្ទេររូបគេ ក្នុងរដូវក្ដៅនេះ។
ខ្សែការពារវ័យ ២២ឆ្នាំរូបនេះ បានបង្ហាញគុណភាពនៅលើទីលានប្រកួតបានយ៉ាងល្អសម្រាប់ក្រុមញញួរយក្ស អំឡុងរដូវកាល ២០២១-២២ នេះ ដោយរកគ្រាប់បាល់បាន ៣គ្រាប់ និងបញ្ជូនឱ្យមិត្តរួមក្រុមសម្រេចទី ៤លើក ក្នុងការបង្ហាញខ្លួន ២៤ប្រកួតគ្រប់ពានរង្វាន់។
យោងតាមការរាយការណ៍កាលពីថ្មីៗនេះបានឱ្យដឹងថា ក្លិបបិសាចក្រហម កំពុងពិចារណាក្នុងការនាំយក កីឡាករក្រុមជម្រើសជាតិអង់គ្លេសរូបនេះ ទៅចូលរួមនៅ Old Trafford ដោយចាត់ទុកគេជាបេក្ខជនជួរមុខ ដើម្បីមកជួយពង្រឹងតំបន់បម្រើ។
យ៉ាងណាមិញ Goal បានចុះផ្សាយថា Rice ក៏ទទួលបានការចាប់អារម្មណ៍ពី Chelsea ជាក្លិបដែលគេធ្លាប់ចាយពេល ៧ឆ្នាំរួមរស់នៅទីនោះ។ ប៉ុន្ដែក្លិបតោខៀវ នឹងពិចារណា រវាងតារាឆ្នើមរបស់ West Ham រូបនេះ ជាមួយកីឡាករ Aurelien Tchouameni របស់ក្លិប Monaco មុនរដូវកាលថ្មី ២០២២-២៣ ឈានចូលមកដល់៕
