ខ្សែប្រយុទ្ធ Karim Benzema របស់ក្លឹប Real Madrid ស្ថិតក្នុងថ្នាក់ដូចគ្នាជាមួយនឹងខ្សែប្រយុទ្ធរបស់ Manchester United កីឡាករ Cristiano Ronaldo និង Erling Haaland របស់ Borussia Dortmund ។ ការថ្លែងរបស់អ្នកចាត់ការក្រុម Los Blancos លោក Carlo Ancelotti ដែលបានសរសើរកីឡាករសញ្ជាតិបារាំងរូបនេះ បន្ទាប់ពីបង្ហាញទម្រង់លេងដ៏អស្ចារ្យរបស់គាត់ក្នុងសប្តាហ៍នេះ។
Karim Benzema គឺជាកីឡាករលេចធ្លោក្នុងការប្រកួត ខណៈដែល Real Madrid បានទទួលជ័យជម្នះយ៉ាងសំខាន់ ២-១ លើក្រុម Athletic Bilbao កាលពីថ្ងៃពុធ។ កីឡាករវ័យ ៣៤ ឆ្នាំរូបនេះបានស៊ុតបញ្ចូលទី ២ គ្រាប់ភ្លាមៗក្នុងរយៈពេល ៧ នាទីនៃការប្រកួត ដើម្បីជួយឲ្យ Los Blancos ទទួលបាន ៣ពិន្ទុ។
អ្នកចាត់ការក្លឹប Real Madrid ត្រូវបានគេសួរថា តើគាត់គិតថា Benzema គឺជាខ្សែប្រយុទ្ធល្អបំផុតនៅក្នុងពិភពលោកនៅពេលនេះទេ ហើយគាត់បានឆ្លើយថា៖ « ខ្ញុំគិតដូច្នេះ ពីព្រោះនៅក្នុងការប្រកួតរបស់គាត់ គាត់បានបន្ថែមសមត្ថភាពដ៏អស្ចារ្យ និងរកគ្រាប់បាលបានស្ទើរគ្រប់ការប្រកួត។ គាត់ស្ថិតនៅកម្រិត Cristiano Ronaldo ឬ Erling Haaland ។ Benzema គឺជាកីឡាករឆ្នើម យើងបានឃើញវាជាថ្មីម្តងទៀត ក្នុងការប្រកួតជាមួយនឹងក្រុម Athletic ដោយមានការស៊ុតបាល់បញ្ចូលទីពីរគ្រាប់ជាប់ៗគ្នា។ គាត់មានទម្រង់លេងដ៏អស្ចារ្យ»៕
