ខ្សែបម្រើ Bruno Fernandes បានសារភាពថាគេចង់ក្លាយជាគ្រូបង្វឹកម្នាក់នាពេលអនាគត បន្ទាប់ពីចូលនិវត្តន៍ពីពិភពបាល់ទាត់ គឺគេគ្រោងនឹងចុះឈ្មោះចូលរៀនវគ្គគ្រូបង្វឹកតែម្ដង។
កីឡាករវ័យ២៧ឆ្នាំរូបនេះ បានក្លាយជាតារាឆ្នើមមួយរូបប្រចាំក្រុមបិសាចក្រហម Manchester United និងអាចនៅសល់ពេលសម្រាប់លេងបាល់ទាត់ច្រើនឆ្នាំទៅមុខទៀត ប៉ុន្តែ Fernandes បានគិតគូផែនការអនាគតនៃជីវិតរបស់គេរួចអស់ហើយ ដោយចង់ដើរតាមគន្លងរបស់គ្រូបង្វឹកសញ្ជាតិព័រទុយហ្គាល់ឆ្នើមៗដូចជា Jose Mourinho ជាដើម។
Fernandes បាននិយាយក្នុងកម្មវិធី Secret Santa ប្រាប់ក្មេងៗថា៖ «បាទ ខ្ញុំចង់ក្លាយជាអ្នកចាត់ការមួយរូប ខ្ញុំនឹងរៀនវគ្គធ្វើជាគ្រូជាបង្វឹក»។
គួរបញ្ជាក់ផងដែរថាកាលពីមុន Fernandes ក៏ធ្លាប់បង្ហើបពីបំណងចង់ក្លាយជាគ្រូបង្វឹកដែរថា៖ «ខ្ញុំរីករាយនឹងបាល់ទាត់ណាស់ អ្នកដឹងទេ ខ្ញុំគិតថាខ្ញុំចង់ធ្វើជាគ្រូបង្វឹក។ និយាយឲ្យស្មោះត្រង់ទៅ ខ្ញុំចង់ធ្វើជាគ្រូបង្វឹក។ ខ្ញុំមិនដឹងថាខ្ញុំចង់ដឹកនាំក្រុមណាទេ ប៉ុន្តែពិតណាស់ បើជាក្រុមធំៗគឺ Manchester United ។ ខ្ញុំគ្រាន់តែចង់ទុកពាក្យខ្លះ បើសិននាពេលអនាគតខ្ញុំក្លាយជាគ្រូបង្វឹក អ្នកគាំទ្រអាចនឹងដាក់សំពាធមកលើខ្ញុំបាន។ ប៉ុន្តែខ្ញុំគិតថាខ្ញុំចង់ធ្វើជាគ្រូបង្វឹកនាពេលអនាគត។ ខ្ញុំមិនច្បាស់ទេថា មានអារម្មណ៍បែបណាចំពោះបាល់ទាត់ តែខ្ញុំនឹងបន្តធ្វើជាផ្នែកមួយក្នុងនេះ ព្រោះជីវិតរបស់ខ្ញុំ គឺទាក់ទងនឹងបាល់ទាត់»៕
