ក្របខណ្ឌ Premier League បានប្រកាសថា ការប្រកួតចំនួន ២ ដែលគ្រោងនឹងធ្វើឡើងនៅថ្ងៃ Boxing Day ត្រូវពន្យារពេល ដោយសារការរាតត្បាតនៃជំងឺកូវីដ-១៩។
ការប្រកួតរវាង Liverpool vs Leeds United និង Wolverhampton Wanderers vs Watford ត្រូវបានលើកពេលព្រោះ Leeds និង Watford នឹងមិនមានកីឡាករគ្រប់គ្រាន់សម្រាប់ការប្រកួតនេះនោះទេ។
សេចក្តីថ្លែងការណ៍ពី Premier League បានបញ្ជាក់ថា៖ «នៅថ្ងៃនេះក្រុមប្រឹក្សាភិបាលអាចធ្វើការសម្រេចចិត្តរបស់ខ្លួនមុនថ្ងៃ Boxing Day ដើម្បីផ្តល់ភាពច្បាស់លាស់ដល់ក្លឹប និងអ្នកគាំទ្ររបស់ពួកគេ។ យើងសូមអភ័យទោសចំពោះភាពរអាក់រអួល ដែលបណ្តាលឱ្យមានផលប៉ះពាល់ដល់គម្រោងការ សម្រាប់ពិធីបុណ្យរបស់អ្នកគាំទ្រទាំងអស់គ្នា»។
«ក្រុមប្រឹក្សាភិបាលបានសន្និដ្ឋានថា Leeds United នឹងមិនអាចចូលរួមការប្រកួតរបស់ពួកគេនៅចុងសប្តាហ៍នេះបានទេ ដោយសារចំនួនកីឡាករដែលមានវិជ្ជមានកូវី-១៩ របួស និងជំងឺ។ ទីលានហ្វឹកហាត់របស់ក្លឹបក៏ត្រូវបានបិទផងដែរ បន្ទាប់ពីបានពិគ្រោះយោបល់ជាមួយទីភ្នាក់ងារសុខសុខភាពរបស់ចក្រភពអង់គ្លេស និង Premier League»។
«Watford FC បន្តមានចំនួនកីឡាករមិនគ្រប់គ្រាន់សម្រាប់ក្រុម បន្ទាប់ពីការប្រកួតរបស់ពួកគេជាមួយនឹងក្រុម Crystal Palace FC កាលពីថ្ងៃសៅរ៍មុនត្រូវបានពន្យារពេល បន្ទាប់ពីការផ្ទុះឡើងនៃកូវីដ-១៩ ។ ដោយសារតែកីឡាករត្រូវធ្វើចត្តាឡីស័ក វាត្រូវបានរំពឹងទុកថា Watford នឹងអាចត្រលប់មកសម្រាប់ការប្រកួតរបស់ពួកគេនៅថ្ងៃអង្គារទី ២៨ ខែធ្នូ ទល់នឹង West Ham United»៕
