ក្លឹបបិសាចក្រហម Manchester United ត្រូវបានគេរាយការណ៍ថាកំពុងទាក់ទងជាមួយអ្នកចាត់ការក្លឹប Sporting Lisbon លោក Ruben Amorim ក្នុងនាមជាអ្នកជំនួសតំណែងគ្រូបង្វឹក Ralf Rangnick ។ អ្នកចាត់ការសញ្ជាតិព័រទុយហ្គាល់ ត្រូវបានវាយតម្លៃខ្ពស់ក្នុងចំណោមគ្រូបង្វឹកដែលកំពុងរីកចម្រើនក្នុងពិភពបាល់ទាត់។ Amorim បានចាកចេញពី Benfica ក្នុងឆ្នាំ ២០១៧ ដើម្បីចាប់ផ្តើមដំណើរថ្មីជាគ្រូបង្វឹក។
អតីតខ្សែបម្រើសញ្ជាតិព័រទុយហ្គាល់វ័យ ៣៦ ឆ្នាំរូបនេះបានធ្វើការជាអ្នកគ្រប់គ្រងជាមួយ Casa Pia, Braga B និង Braga មុនពេលគាត់ត្រូវបានចាកចេញទៅចូលរួមជាមួយ Sporting ក្នុងកិច្ចសន្យា ៨ លានផោន។
អ្នកកាសែត Jorge Nicola បាននិយាយថា លទ្ធភាពនៃការមកដល់របស់ Amorim នៅ Old Trafford ត្រូវបានយល់ព្រមដោយ Cristiano Ronaldo និង Bruno Fernandes ។
ក្នុងរយៈពេលត្រឹមតែមួយឆ្នាំនៃអាជីពជាអ្នកចាត់ការរបស់គាត់នៅ Sporting លោក Amorim បានចារឈ្មោះរបស់គាត់នៅក្នុងសៀវភៅប្រវត្តិសាស្ត្ររបស់ក្លឹប បន្ទាប់ពីបានឈ្នះពានរង្វាន់ League Cup ចំនួនពីរ និងដឹកនាំក្រុមក្នុងការឈ្នះពានរង្វាន់ Primeira Liga ។ ក្រុមរបស់គាត់នៅតែមិនស្គាល់ចាញ់ក្នុងការប្រកួតចំនួន ៣២ ។
បញ្ជាក់ផងដែរថា Manchester United នឹងត្រូវបង់ប្រាក់ ២៥ លានផោនទៅឱ្យ Sporting ប្រសិនបើក្លឹបយក្សនៅ Premier League របស់អង់គ្លេសចង់ចុះហត្ថលេខាលើគាត់៕
