លោក Joe Cole ជឿជាក់ថាក្លិប Manchester City នឹងអាចយកឈ្នះ Liverpool និង Chelsea ក្នុងការលើកពាន Premier League រដូវកាលនេះ។
កាលពីរដូវកាលមុន ភាគីខាងគ្រូបង្វឹក Pep Guardiola បានក្លាយជាម្ចាស់ជើងឯក Premier League ក្រោយយកឈ្នះ Manchester United ដែលឈរលេខ ២ដល់ទៅ ១០ពិន្ទុដាច់។
យ៉ាងណាមិញកាលពីមុនលោក Cole ជឿថា Chelsea នឹងលើកពាន Premier League រដូវកាលនេះ ប៉ុន្តែបន្ទាប់ពីឃើញថាភាគីខាងលោក Thomas Tuchel បានធ្លាក់មកដល់លេខរៀងទី៣ ក្រោយប្រកួតចាញ់ West Ham និងស្មើ Everton នាពេលកន្លងមក លោក Cole ក៏ប្ដូរចិត្តគិតថា Man City ដែលកំពុងកាន់កាប់កំពូលតារាងគឺជាម្ចាស់ពាន Premier League វិញ។
ទោះជាយ៉ាងណាអតីតវីរបុរសបាល់ទាត់អង់គ្លេសលោក Joe Cole បានថ្លែងប្រាប់ BT Sport ថា៖ «ខ្ញុំនឹងជ្រើសយក Man City ហើយនេះជាលើកដំបូង ដែលខ្ញុំវង្វេងវង្វាន់។ ការពិតគឺឥលូវនេះ Chelsea បានបាត់បង់ពិន្ទុហើយ ពេលខ្ញុំបានមើលការប្រកួត Man City កាលពីទល់នឹង Leeds ពួកគេគឺពិតជាល្អណាស់។ អ្វីដែលខ្ញុំចង់និយាយជាចំបង គឺពួកគេមានបទពិសោធន៍ ព្រោះពួកគេធ្លាប់ធ្វើវាពីមុនកាលពីប៉ុន្មានឆ្នាំមកនេះ»៕
