អ្នកចាត់ការក្រុម Tottenham Hotspur លោក Antonio Conte បានប្រៀបធៀបខ្សែការពារឆ្វេង Ben Davies ទៅនឹងប្រធានក្រុម Chelsea កីឡាករ Cesar Azpilicueta ។
Conte រីករាយដែលឃើញ Davies លេងបានយ៉ាងល្អក្នុងតួនាទីដែលគាត់ជឿថា អាចទទួលបានល្អបំផុតពីខ្សែការពារពេញវ័យ ២៨ ឆ្នាំរូបនេះ។ អ្នកចាត់ការសញ្ជាតិអ៊ីតាលីមានអារម្មណ៍ថា Davies មានកម្លាំងការពារ ដែលអាចជួយបានយ៉ាងច្រើន។
ថ្លែងបន្ទាប់ពីការទទួលជ័យជម្នះ ៣-០ របស់ Tottenham Hotspur លើ Norwich City លោក Conte បាននិយាយថា៖ «Ben លេងបានល្អណាស់ ហើយខ្ញុំគិតថាក្នុងតួនាទីនោះ ខ្ញុំអាចទទួលបានផលល្អបំផុតពីគាត់ ដែលវាដូចគ្នាទៅនឹងប្រធានក្រុមតោខៀវកីឡាករ Cesar Azpilicueta ។ វាជារឿងសំខាន់ក្នុងការការពារបានល្អ ប៉ុន្តែទន្ទឹមនឹងនោះ វាជារឿងសំខាន់ក្នុងការលេងបាល់ទាត់ គឺបុគ្គលិកលក្ខណៈ»។
លោក Antonio Conte ក៏បានសរសើរដល់បុគ្គលិកលក្ខណៈរបស់កីឡាករ Ben Davies ទាំងក្នុងនាមកីឡាករ និងជីវិតឯកជនរបស់គាត់ផងដែរ។ គាត់បាននិយាយថា «Ben កំពុងបង្ហាញពីភាពរឹងមាំដ៏អស្ចារ្យ។ គាត់លេងបានល្អណាស់។ យើងកំពុងនិយាយអំពីមនុស្សល្អ គាត់តែងតែផ្តោតអារម្មណ៍លើការប្រកួត ហើយគាត់លេងបានល្អ»៕
