Rio Ferdinand ជឿជាក់ថា Aaron Wan-Bissaka និង Luke Shaw នឹងពិបាកក្នុងការដណ្តើមយកតំណែងសម្រាប់ជម្រើស ១១នាក់ដំបូងក្នុងក្រុម Manchester United ក្រោមការដឹកនាំរបស់លោក Ralf Rangnick។
គ្រូបង្វឹកថ្មីរបស់ Manchester United ពេញចិត្តជាមួយខ្សែការពារដែលអាចបញ្ជូនបាល់ទៅមុខ និងបញ្ជូនបាល់ផ្តាច់ទៅឲ្យតំបន់ប្រយុទ្ធ។ និយាយអំពីការលំបាកដែល Wan-Bissaka និង Shaw ត្រូវប្រឈមនៅពេលខាងមុខ លោក Ferdinand បាននិយាយថា៖
«ខ្ញុំត្រូវតែនិយាយដោយស្មោះត្រង់ Wan-Bissaka មានការលំបាកក្នុងការត្រលប់មកវិញក្នុងជម្រើស ១១នាក់ដំបូងសម្រាប់ក្រុមនេះ។ ដូចគ្នាសម្រាប់ Luke Shaw ពួកគេទាំងពីរជួបការលំបាកដូចគ្នា។ រឿងមួយដែលអ្នកគ្រប់គ្រងថ្មីរូបននេះពេញចិត្តគឺ ខ្សែការពារដែលអាចនាំលេង និងផ្តល់បាល់ឲ្យទៅកាន់តំបន់ប្រយុទ្ធ»។
គួររំលឹកដែរថា Diogo Dalot បានចូលមកជំនួស Aaron-Wan Bissaka នៅខ្សែការពារស្តាំ ខណៈ Alex Telles ចូលមកជំនួស Luke Shaw ដែលរបួសនៅខ្សែការពារឆ្វេង។ កីឡាករដែលចូលមកទាំងពីររូបធ្វើបានយ៉ាងល្អក្នុងការប្រកួតកាលពីពេលថ្មីៗរបស់ Manchester United ហើយទំនងជានឹងបន្តចាប់ផ្តើមក្នុងការប្រកួតខាងមុខ៕
