ជាការពិតណាស់ លទ្ធផលបច្ចុប្បន្ននាពេលចុងក្រោយនេះ មិនសូវជាល្អសម្រាប់ Mauricio Pochettino នៅ Paris Saint-Germain ក្នុងរដូវកាលនេះ ខណៈដែលមានបញ្ហាជាច្រើនកំពុងកើតមាននៅក្នុងក្លឹប ចំពេលមានការលើកឡើងថា គ្រូបង្វឹកសញ្ជាតិអាហ្សង់ទីនរូបនេះក៏កំពុងមានបញ្ហានៅឯកីឡដ្ឋាន Parc des Princes។
Pochettino កំពុងស្ថិតនៅក្រោមភាពមិនច្បាស់លាស់ ក្រោយមានផ្សព្វផ្សាយជាច្រើនដែលបានបង្ហាញថា កីឡាករ PSG មួយចំនួនមានជម្លោះជាមួយគ្រូបង្វឹក ស្របពេលដែលខ្លួនគាត់ក៏ត្រូវបានផ្សារភ្ជាប់ជាមួយនឹងការផ្ទេរទៅ Manchester United ផងដែរ។
យោងតាមសារព័ត៌មាន L’Equipe មានការលើកឡើងថា ថ្មីៗនេះហាក់បង្ហាញការសង្ស័យមួយចំនួន ជាមួយទម្រង់ដឹកនាំរបស់ Pochettino បានធ្លាក់ចុះ ជាពិសេសប្រព័ន្ធវាយលុករបស់ Kylian Mbappe, Messi និង Neymar។
ចរិតលក្ខណៈផ្ទាល់ខ្លួនរបស់ Pochettino ក៏ត្រូវបានរិះគន់ផងដែរ ដោយអ្នកខ្លះជឿថាគាត់ទន់ជ្រាយជាមួយកីឡាករ ហើយមិនស្តីបន្ទោសពួកគេនៅពេលចាំបាច់។
ដោយឃើញដូច្នេះលោក Pochettino បានបញ្ជាក់ពីជំហររបស់គាត់ ហើយបានសង្កត់ធ្ងន់ថា «សារព័ត៌មាននឹងមិនតែងតែមានចិត្តល្អចំពោះ PSG នោះទេ ដោយសារការផ្តោតសំខាន់ទៅលើក្លឹប»។
ការប្រកួតបន្ទាប់សម្រាប់ PSG គឺជាការប្រកួតវគ្គចែកពូល Champions League ចុងក្រោយរបស់ពួកគេជាមួយ Club Brugge ទោះបីជាក្រុម Ligue 1 បានបញ្ចប់ក្នុងចំណាត់ថ្នាក់លេខ ២ ដោយតាមពីក្រោយក្រុមលេខ១ Manchester City ចំនួន ៤ពិន្ទុក្នុងពូល A ដោយមិនទាន់គិតពីលទ្ធផលរបស់ពួកគេជាមួយនឹងក្រុមបែលហ្ស៊ិក៕
