Sergio Ramos បានស៊ូទ្រាំនឹងការចាប់ផ្តើមដ៏លំបាកនៅ Paris Saint-Germain ដោយមិនទាន់បានបង្ហាញខ្លួនឱ្យក្លឹបថ្មីរបស់គាត់នៅឡើយទេ ដោយសារបញ្ហារបួសជាបន្តបន្ទាប់។
អតីតប្រធានក្រុម Real Madrid រូបនេះ បានខកខានជាមួយក្រុម សម្រាប់ការប្រកួតចាញ់ Manchester City ២-១ ក្នុងក្របខ័ណ្ឌ Champions League ខណៈដែលគាត់ហ៊ានអះអាងថា នឹងត្រៀមខ្លួនចូលរួមជួយស្តារឡើងវិញ ចំពោះការបរាជ័យមួយនេះ។
Ramos បាននិយាយជាមួយ Amazon Prime Video ថា៖ «ខ្ញុំជឿជាក់លើខ្លួនខ្ញុំ និងការខិតខំប្រឹងប្រែង។ ខ្ញុំផ្តោតលើការផ្តល់ឱ្យក្លឹបត្រឡប់មកវិញនូវទំនុកចិត្ត ដែលបានដាក់មកលើខ្ញុំ។ ខ្ញុំសង្ឃឹមថា នឹងឈានដល់កម្រិតល្អបំផុតរបស់ខ្ញុំ»។
យ៉ាងណាមិញ ថ្វីបើមានការខកចិត្តនាពេលថ្មីៗនេះក៏ដោយ ក៏ខ្សែការពារសញ្ជាតិអេស្ប៉ាញវ័យ ៣៥ ឆ្នាំរូបនេះ ជឿជាក់ថា គាត់នៅតែអាចលេងនៅកម្រិតកំពូលសម្រាប់រយៈពេលយូរនៅឡើយ៕
