ខ្សែបម្រើក្លិប Manchester United កីឡាករ Paul Pogba ចង់ក្លាយទៅជាកីឡាករដែលទទួលបានប្រាក់ឈ្នួលខ្ពស់ជាងគេនៅក្នុងក្របខណ្ឌ Premier League ទើបរូបគេសម្រេចចិត្តនឹងបន្តកុងត្រាថ្មី។
ពិតណាស់ កុងត្រារបស់ Pogba នៅOld Trafford នឹងអស់សុពលភាពក្រោយបញ្ចប់រដូវកាលនេះ ដូច្នេះប្រសិនបើរូបគេមិនបន្តកិច្ចសន្យាថ្មីទេ នោះមានន័យថា កីឡាករសញ្ជាតិបារាំងខាងលើអាចចាកចេញពីក្លិបបានដោយគ្មានតម្លៃខ្លួន។
បើយោងទៅតាមការចុះផ្សាយរបស់កាសែតបារាំង L’Equipe បានទម្លាយឲ្យដឹងថា Pogba បានបញ្ជក់យ៉ាងច្បាស់ថា រូបគេនឹងបន្តកុងត្រាថ្មីលុះត្រាតែ Man Utd ផ្តល់ប្រាក់ឈ្នួលឲ្យគេថ្លៃកប់ពពក ពោលគឺត្រូវតែធ្វើឲ្យគេក្លាយទៅជាកីឡាករដែលមានប្រាក់ពលកម្មច្រើនជាងគេបំផុត ក្នុងប្រវត្តិសាស្ត្រនៃក្របខណ្ឌ Premier League ខណៈបច្ចុប្បន្ន Cristiano Ronaldo ជាអ្នកទទួលបានប្រាក់ឈ្នួលខ្ពស់ជាងគេប្រចាំលីគ ដោយឡែករូបគេទទួលបានចំនួន ៥១ម៉ឺនផោន/សប្តាហ៍តែប៉ុណ្ណោះ៕
