លោក Ole Gunnar Solskjaer និយាយថាលោកនឹងទាក់ទងជាមួយលោក Nuno Espirito Santo ដើម្បីបង្ហាញនូវសាមានចិត្ត បន្ទាប់ពីលោកត្រូវបាន Tottenham Hotspur បណ្ដេញចេញពីតំណែងកាលពីថ្ងៃចន្ទ។
លោក Nuno បានស្ថិតនៅក្នុងសម្ពាធ ចាប់តាំងបរាជ័យ ០-៣ ក្រោមថ្វីជើងរបស់ Manchester United កាលពីថ្ងៃសៅរ៍។ លោកត្រូវបានអ្នកគាំទ្រស្រែកចំអក នៅពេលប្ដូរខ្សែប្រយុទ្ធ Lucas Moura ចេញពីទីលាន។
ជ័យជម្នះកាលពីចុងសប្ដាហ៍កន្លងទៅ បានផ្លាស់ប្ដូរវាសនារបស់លោក Solskjaer ជាមួយក្លិបបិសាចក្រហម បន្ទាប់ពីកៅអីរបស់លោកនៅ Old Trafford កំពុងឡើងកម្ដៅខ្លាំង តាំងពីសប្ដាហ៍មុន។ លោកក៏បានបង្ហាញអារម្មណ៍អាណិតអាសូរដល់លោក Nuno ដែលបានបាត់បង់តំណែង។
គ្រូបង្វឹកជនជាតិន័រវែសរូបនេះបាននិយាយថា៖ «វាមិនល្អនោះទេដែលឃើញគ្រូបង្វឹកល្អបាត់បង់ការងាររបស់ពួកគេ គាត់បានខិតខំប្រឹងប្រែងធ្វើការ ហើយខ្ញុំមិនដឹងពីស្ថានភាពរបស់គាតនៅ Tottenham នោះទេ ប៉ុន្ដែក្នុងនាមមិត្តរួមអាជីព អ្នកនឹងមិនសប្បាយចិត្តនោះទេ ដែលរឿងនេះបានកើតឡើង។ អ្នកព្យាយាមភ្ជាប់ទំនាក់ទំនងជាមួយគាត់ ហើយបង្ហាញពីអារម្មណ៍របស់អ្នក»៕
